د خیبر پښتونخوا د سوات په مينګوره کې د پښتنو زده کونکو سازمان (پښتون سټوډنټس فیډرېشن) غړو د سیمې د امنیت د ښه والي لپاره لاریون کړی دی.
د ډېسېمبر پر ۱۳مه، په نشاط څلور لاري ته دوی ورټول شوي ول د امن غوښتنې شعارونه یې ورکول.
د لاریون ګډونوال محمد عزیز خان وکیل مشال راډیو ته وویل چې د ډېسېمبر په ۱۲مه، د شپې په ډک بازار کې وسلوالو پر پولیسو ډزې وکړې، چې په نتیجه کې یو پولیس افسر ووژل شو او یو بل ټپي شو. خو پولیسو دا پېښه د سمګلرانو برید وباله چې د منلو وړ نه ده.
د سوات د پښتون سټوډنټس فیډریشن مشر حارث باچا مشال راډیو ته وویل چې که پولیس، چې د ولس ساتونکي دي، خوندي نه وي، نو حکومت به عام ولس ته څنګه امنیت ورکړي؟
د سوات پولیسو په یوه خپره شوې خبرپاڼه کې ویلي چې د نومبر په ۱۲مه، په مينګوره بازار کې د منګلور تاڼې تاڼېدار باندې د نشه يي توکو پلورونکو ډزې وکړې، خو پولیسو په ځوابي عملیاتو کې یو سمګلر وواژه.
د دې پېښې په اړه د بېلابېلو اړخونو څرګندونې ښيي چې په سیمه کې د امنیت وضعیت د اندېښنې وړ دی، او خلک د لا ښه امنیت غوښتنه کوي.