په پېښور کې مدني او سیاسي فعالانو د صوبې د حقونو ترلاسه کولو لپاره د ولسي تحریک پیلولو اعلان کړی دی.
د جولای پر څلورمه د پېښور په شاهي باغ کې یوه ولسي غونډه وشو چې پکې د خیبر پښتونخوا د بېلا بېلو برخو سیاسي او مدني فعالانو برخه واخیسته.
هغوی په غونډه کې د پښتونخوا ایکشن کمېټۍ په نوم یوه ډله جوړه کړه چې په مشرۍ به یې ولسي غورځنګ پرمخ وړي.
د کمېټۍ یو غړي شکیل وحید الله د جولای پر څلورمه له مشال راډیو سره په خبرو کې وویل چې په غونډه کې پرېکړه وشوه چې د ضلعو پر کچ به د ولسي کمېټیو په همکارۍ د بجلۍ د لوډشیډنګ (پارچاو)، ناروا ټیکسونو او د صوبې د نورو حقونو لپاره مبارزه کوي.
دا په داسې حال کې ده چې د خیبر پښتونخوا په صوابۍ، ملاکنډ، سوات او ځینو نورو سیمو کې د ولسي ایکشن کمېټیو په نامه ولسي تحریکونه پیل شوی دي او د جون پر ۳۰مه د صوابۍ ایکشن کمېټۍ په نامه د حقونو ولسي تحریک د ضلعې په بېلا بېلو برخو کې احتجاجونه وکړل او د بجلۍ د بېلونو د نه ورکولو اعلان یې وکړ.
دا هم وګورئ:
د ماربلو کاروباریانو د بجلۍ د بیلونو زیاتېدو په احتجاج کې کارخانې بندې کړيصوابۍ کې د ارزانې برېښنا لپاره احتجاجي تحریک پیل شوی دیبلوچستان کې کروندګرو د بجلۍ د کمي پرضد پیه جام هړتال کړی دیپه خیبر پښتونخوا کې په وروستیو کې برېښنايي پارچاو زیات شوی دی چې پر ضد یې خلکو احتجاجونه کړي دي. د صوبې اوسېدونکي وایي د صوبې په ځینو سیمو کې تر ۲۰ ساعتونو زیات لوډشیډنګ کېږي.
دا راز حکومت د ۲۰۲۴-۲۵ مالي کال لپاره په بجټ کې نوي ټیکسونه شامل کړی دي. په دې کې د تېلو نرخونه زیاتول، له صادراتو یا برامداتو څخه پر ترلاسه کېدونکي عاید او سېمېنټو ټیکسونه او نورې مالیې شامل دي.
دا په داسې حال کې ده چې د لوډشیډینګ او د بجلۍ او اوبو خالصې ګټه کې د صوبې د برخې په اړه د صوبې او وفاق تر مینځ اختلاف روان دی.
د خیبر پښتونخوا اعلاوزیر علي امین ګنډه پور ویلي که وفاقي حکومت د لوډشیډنګ ستونزه نه هواروي نو د بجلۍ نظام به خپل واک کې اخلي، خو وفاقي حکومت وايي چې په هغه سیمو کې زیات لوډشیډنګ کوي چې پکې بجلي غلا کېږي او خلک بېلونه نه ورکوي.