د خیبر پښتونخوا نګران وزیر اعلا محمد اعظم خان ویلي د صوبې د امنیتي او اقتصادي ستونزو په اړه به له مرکزي حکومت سره خبرې کوي.
د وزیراعلا له دفتره په خپرې شوې خبرپاڼې کې راغلي چې اعظم خان دا خبره د جنورۍ پر ۲۴مه هغې غونډې ته وکړه د خیبر پښتونخوا د پولیسو مشر معظم جاه انصاري، چیف سېکرټر شهزاد بنګښ او نورو لوړ پوړو امنیتي او انتظامي چارواکو ګډون پکې کړی وو.
نگران وزیراعلی خیبر پختونخوا محمد اعظم خان کی زیر صدارت صوبے کی امن و امان، معاشی صورتحال اور مالی مسائل سے متعلق اجلاس۔• متعلقہ حکام کی جانب سے نگران وزیراعلی کو صوبے کو درپیش مالی مسائل اور امن و امان کی تازہ صورتحال کے بارے تفصیلی بریفنگ۔Thread pic.twitter.com/tSnLnHzsSK
— Chief Minister KP (@KPChiefMinister) January 24, 2023
امنيتي چارواکو غونډې ته وويل چې په ۲۰۲۲ز کې په خيبر پښتونخوا کې ۴۹۴ وسلوال بریدونه شوي چې په نتیجه کې یې ۱۱۹ پولیس سرتېري وژل شوي او ۱۱۲ ژوبل کړي دي. د چارواکو په وینا پر دې مهال د ترهګرۍ ضد پولیسو له خوا د لټون په عملیاتو کې ۸۱۲ وسلوال نیول شوي دي.
د خبرپاڼې له مخې، وزیراعلا غونډې ته په خپله وینا کې د صوبې امنیتي حالت د اندېښنې وړ وباله خو زیاته يې کړه چې د امنیت ټینګ ساتلو لپاره به ټولې وسیلې په کار راولي.
اعظم خان وويل چې د صوبې د اقتصادي او امنیتي ستونزو د هواري لپاره به له وزیراعظم شهباز شریف سره خبرې کوي او له مرکزي حکومته به د مرستې غوښتنه کوي.
دا غونډه په داسې حال کې شوې چې د ۲۰۲۲ز کال له اوړي راهیسې په خیبر پښتونخوا کې امنیتي وضع خرابه شوې ده چې پرضد یې په یوشمېر ضلعو کې پراخې مظاهرې او ولسي پاڅونونه شوي دي.
د جنورۍ پر ۱۹مه هم د خیبر پښتونخوا په صوابۍ کې د ناامنۍ ضد احتجاجي غونډه وشوه چې ورته د سیمې د یوشمېر ګوندونو او غورځنګونو مشران او پلویان ورغلي ول.
د خیبر پښتونخوا پخواني حکومت په تېرو میاشتو کې په بیا بیا د امنیت ټینګښت ته ژمنتیا ښوولې وه او وفاقي حکومت هم ټینګار کړی دی چې د ناامنۍ پرضد د هغې صوبې مرسته کوي.
خو د نومبر په پای کې د تحریک طالبان پاکستان (ټي ټي پي) له لوري په پاکستان کې د حملو بیا پیلولو تر اعلان وروسته پر پولیسو او امنیتي ځواکونو بریدونه زیات شوي دي.
ستاسې سېسټم د HTML5 په چلولو کې ستونزه لري.
په ۲۰۲۲ز کال کې خیبر پښتونخوا کې ناامني ولې زیاته شوه؟
د پاکستان د کورنیو چارو وزیر رانا ثناالله د جنورۍ پر څلورمه په اسلام اباد کې خبري غونډې ته ویلي ول چې هېواد یې "د زیاتېدونکو بریدونو" ښکار دی. ده زیاته کړې وه چې په ۲۰۲۲ز کال کې د "ترهګرۍ ۶۷ فیصده پېښې په خیبر پښتونخوا، ۳۱ فیصده یې په بلوچستان" او پاتې دوه فیصده یې د پاکستان په نورو برخو کې شوې وې.
وفاقي حکومت په وروستیو کې ویلي ول چې د وسلوالو ډلو پرضد یې د کاروایۍ پرېکړه کړې ده او وسلوال د هېواد امنیت خرابولو ته نه پرېږدي.
د پاکستاني پوځ مشر جنرال عاصم منير د ډېسېمبر پر ۲۳مه شمالي وزیرستان ته د سفر پر مهال ویلي ول چې پوځ امنیتي حالاتو ته توجه ورکوي او "د ترهګرۍ مخنيوي ته ژمن" دی.