جمعیت علمای اسلام (ف ) او پاکستان پیپلز ګوند د اييني ترميم پر مسودې سلا شوي دي

د جمعیت علمای اسلام (ف) مشر مولانا فضل الرحمان (کيڼ لوري ته) او د پیپلز ګوند مشر بلاول بوټو زرداري د يوې خبري غونډې پر مهال ـ انځور له ارشيفه

د پاکستان د جمعیت علما اسلام (ف ) او پاکستان پیپلز ګوند مشران د هغه هېواد په ايين کې د بدلون پر يوې مسودې سلا شوي دي.

دا اعلان د اکتوبر پر ۱۵مه په کراچۍ کې د پیپلز ګوند په دفتر بلاول هاوس کې د هغه ګوند د مشر بلاول بوټو زرداري او د جمعیت علمای اسلام (ف) مشر مولانا فضل الرحمان تر ملاقات وروسته ګډې خبري غونډې ته وکړ.

مولانا فضل الرحمان خبریالانو ته وویل، هڅه کوي چې نور ګوندونه هم د اییني ترمیم په اړه رضا کړي. "زه دومره ويلی شم چې موږ دواړو ګوندونو پر [اييني] مسوده اتفاق وکړ. سبا (د اکتوبر پر ۱۶مه) [د مسلم ليګ (ن) له رهبر] محمد نوازشريف سره ملاقات کوم او موږ غواړو چې هغه هم د دې لپاره رضا کړو. سبا به په اسلام اباد کې د پاکستان تحريک انصاف له مشرانو سره هم لیدنه کوم. زه له هغوی سره په تماس کې يم او زموږ دا هڅه ده چې د اييني ترميم په مسوده کې يو داسي اتفاق جوړکړو چې هغه د ټولو له خوا متفقه اييني ترميم وګڼل شي."

بلاول بوټو زرداري خبري غونډې ته وویل چې بايد ټول ګوندونه د اییني ترمیم پر مسودې سلا شي او له پارلېمانه یې منظوره کړي.

مولانا فضل الرحمان له دې وړاندې، د سېپټېمبر پر ۲۱ مه ويلي ول چې ګوند یې له حکومت سره پوځ او عدلیې ته د زیات واک ورکولو ترڅنګ د پوځي عدالتونو پر مسله اختلاف لري او نه غواړي چې په ايين کې داسې ترميم وشي چې د بشري حقونو خلاف وي.

دا په داسې حال کې ده چې ټاکل شوې چې د مسلم لیګ (ن) په مشرۍ د پاکستان واکمن اېتلاف په اساسي قانون کې د بدلونونو لپاره د "اييني پیکېج" په نوم مسوده پارلېمان ته وړاندې کړي.

حکومت غوښتل چې د سپریم کورټ او های کورټونو د قاضیانو د دندو او نورو چارو لپاره قانوني مسوده قامي اسمبلۍ او سېنېټ ته وړاندې کړي خو د سېپټېمبر پر ۱۶مه د مخالفو ګوندونو استازو د اسمبلۍ په غونډه کې هغه بدلونونه د "قاضیانو پر واک ګوزار" وبلل. همدا لامل دی چې حکومت پارلېمان ته د مسودې وړاندې کول وځنډول.

خو وفاقي حکومت هغه اییني ترمیم د هېواد د عدالتي نظام د اصلاح لپاره اړین بولي او دریځ لري چې هغه بدلونونه به د عدالتونو کارونه اسانه کړي او ولس به له "چټکو او اغېزناکه" عدالتي پرېکړو ګټه واخلي.

دا هم وګورئ:

اېمل ولي خان وايي که وفاقي حکومت یې شرطونه پوره کړي نو ورسره به ۲۶م اییني ترمیم ومنيتحریک انصاف: مرکزي حکومت د اسټېبليشمنټ په خوښه په ايين کې بدلون کول غواړيمولانا فضل الرحمان: حکومت د اییني ترمیم له لارې د پوځ واک زیاتول غواړيسجاد حميد وايي د اييني عدالت جوړولو پر ځای دې د ججانو شمېر زيات کړل شي

خو د خیبر پښتونخوا په اسمبلۍ کې د واکمن پاکستان تحریک انصاف استازو تور پورې کړی چې وفاقي حکومت د امنیتي ادارې (اېسټیبلېشمنټ) په خوښه په ایین کې بدلون کول غواړي.

د خيبر پښتونخوا د قانوني چارو وزیر افتاب عالم اپرېدي د سېپټېمبر پر ۱۹مه د صوبايي اسمبلۍ غونډې ته په وینا کې دعوه وکړه چې حکومت په ایین کې د بدلون له لارې د سپریم کورټ واک کمول او په مقابله کې یې وفاقي اییني عدالت جوړول غواړي.

له تحریک انصاف پرته عوامي نیشنل پارټۍ هم ویلي چې د پاکستان د ایین ۲۶م ترمیم به په هغه صورت کې مني چې وفاقي حکومت یې شرطونه ومني. د ګوند ویاند احسان الله د سېپټېمبر په ۱۷مه مشال راډیو ته ویلي ول چې د ګوند مشر اېمل ولي خان دا شرطونه ایښي چې وفاقي حکومت دې د خیبر پښتونخوا له نومه د "خیبر" کلمه لیرې کړي، د اییني څوکیو لرونکو چارواکو کاري موده دې نه غځوي او د سیاستوالانو مقدمې دې په پوځي عدالتونو کې نه چلېږي.

تر دې یوه ورځ مخکې د پاکستان د قانون وزير اعظم نذیر تارړ قامي اسمبلۍ ته ويلي ول چې د اييني بدلون لپاره د جمعيت علمای اسلام (ف) تر څنګ د ټولو ګوندونو ملاتړ ته اړتيا لري. خو هغه د دې قانوني بدلونونو په اړه نور تفصيل ور نه کړ.

د پاکستان په اساسي قانون کې د بدلون لپاره د قامي اسمبلۍ او سېنېټ د خورا لوی اکثریت ضرورت وي نو ځکه اېتلافي حکومت د جمعیت علمای اسلام (ف) او نورو ګوندونو ملاتړ ته اړتیا لري.