د شمالي وزیرستان په میرلي کې ناڅرګنده وسلوالو په هدفي برید کې یو بل تن په ډزو وژلی دی.
په میرلي کې د پولیس تاڼې یو چارواکي او ځايي خلکو مشال راډیو ته وویل چې دا هدفي وژنه د مې پر شپږمه شوې ده.
پولیسو، یو ځايي تن وقاص خان او د پښتون ژغورنې غورځنګ د هغې سیمې مشر عید رحمان وزیر مشال رادیو ته وویل چې وژل شوی تن یاسر شاه نومېږي او د خیبر د جمرود دی.
د دوی په وینا، یاسر شاه د ټرک ډرېور وو او پوځیانو ته به یې د اوبو وړلو مزدوري کوله او وسلوالو وژلی دی.
چا تر اوسه د دې پېښې ذمه واري نه ده منلې. پولیس او د ضلعې انتظامې چارواکي وايي چې د نامعلومه وسلوالو پرضد یې مقدمه درج کړې ده.
په شمالي وزیرستان کې په ۲۰۲۴ز کال کې تر اوسه دا ۱۸م هدفي برید دی. په ۲۰۲۳ز کال کې هلته ۴۴ هدفي بریدونه شوي ول.
دا هم وګورئ: د خيبر پښتونخوا حکومت وايي د پوليسو لپاره د ۷ اربه روپيو وسايل اخليدا په داسې حال کې ده چې د شمالي وزیرستان په ګډون د خیبر پښتونخوا په یو شمېر ضلعو کې په پرلپسې توګه د ناامنۍ پېښې روانې دي.
د شمالي وزیرستان سیاسي اتحاد په هغه ضلع کې د ګوندونو پر غړو او مخکښانو پر بریدونو اندېښنه ښوولې ده.
د اتحاد مشر خلیل وزير د مې پر څلورمه مشال راډيو ته وويل چې په سیمه کې ۸۰،۰۰۰ پوځیان ځای پر ځای دي خو بیا هم پر سیاسي او ولسي خلکو پرله پسې بریدونه کېږی. "سیاسي خلک د وطن ژبه او سترګې وي. دوی صرف سیاسي بیان کړی وي، چا ته یې تکلیف یا تاوان نه دی رسولی خو بیا هم سیاسي خلک مسلسل ټارګېټ (په نښه) کېږي."
وزیر وویل، په سیمه کې زیاتېدونکې ناامني د دې ښکارندويي کوي چې امنیتي سرتېري یې په مخنیوي کې پاتې راغلي دي.
ده زیاته کړه چې له دې پرته چې سرتېري پر سړکونو او لارو پر امنیتي پوستو له ګاډو څخه خلک کوز کړي او تالاشي یې واخلي، دوی د هغوی نوره ګټه نه ويني.
دا تر هغې وروسته ده چې وسلوالو د مې پر څلورمه په تپي سیمه کې د جماعت اسلامي سیاستوال ملک رحمان الله وزیر وواژه. پر هم هغه ورځ د بنو په بکاخېلو کې یو بل وګړی ووژل شو او دا راز په بنو کې د کالج یو استاد په برید کې ژوبل شو.
رحمان الله وزیر د سپلګې د بلدیاتي ادارې د کلیوالې شورا مشر (وېلېج چېرمېن) او په شمالي وزیرستان کې د جماعت اسلامي ګوند پخوانی امیر وو.
پر نوموړي د حملې ذمه واري لا چا نه ده منلې.
دا هم وګورئ:
د شمالي وزيرستان اوسېدونکي: ۱ کس د امنیتي ځواکونو حراست کې وژل شوی دیپه همدې حال کې د جماعت اسلامي يو مشر او پخواني سېنېټر مشتاق احمد خان د مې پر څلورمه پر اېکس په ويډيو بیان کې له پولیسو، پوځ او انتظامي چارواکو څخه د امنيت برابرولو غوښتنه وکړه.
هغه پر امنيتي ځواکونو نيوکې کړي او زیاته کړې یې ده چې د پوځ پر پراخه شتون سربېره "د ترهګرۍ" پېښو ګڼې پوښتنې زېږولې دي.
شمالی وزیر ستان میں سابق امیر جماعت اسلامی شمالی وزیر ستان ملک رحمان اللہ ٹارگٹ کلنگ میں شہید کر دیئے گئے.انا للہ و انا الیہ راجعونملک رحمان اللہ محب وطن، محب عوام شخصیت تھے۔ ملک رحمان اللہ منتخب ویلج کونسل کے چیئرمین بھی تھے۔ میں ان کے لواحقین سے تعزیت کا اظہار کرتا ہوں۔ میں… pic.twitter.com/Ll2NdBNHjk
— Senator Mushtaq Ahmad Khan | سینیٹر مشتاق احمد خان (@SenatorMushtaq) May 4, 2024
د خیبر پښتونخوا د نورو برخو تر څنګ په شمالي وزیرستان کې ناامني زیاته شوې ده. سږ کال په هغه ضلع کې ۱۷ هدفي بریدونه شوي دي چې پکې د سیاسي او قبایلي مشرانو ترڅنګ ولسي خلکو ته زیانونه اوښتي دي.
په شمالي وزیرستان کې د ناامنۍ پر ضد خلکو پراخ احتجاجونه، جرګې او لاریونونه کړي دي.
خو د پاکستان حکومت او پوځ وايي چې د ترهګرۍ ختمولو ته ژمن دي او د دې لپاره یې د وسلوالو پرضد هدفي عملياتو ته دوام ورکړی دی.
د پوځ د عامه اړیکو دفتر (ای اېس پي ار) د مې پر څلورمه په یو بیان کې په شمالي وزیرستان کې د شپږو مشکوکو وسلوالو د وژنې دعوه وکړه او و یې ویل چې هغوی پر امنیتي او ولسي خلکو په حملو کې ککړ ول.
وسلوالو د پوځ د ادعا په اړه څه نه ول ویلي.
په شمالي وزيرستان کې ناقانونه تحريک طالبان پاکستان تر ټولو زياته فعاله وسلواله ډله ده خو له دې پرته هلته نورې ناقانونه وسلوالې ډلې هم فعاله دي.
د پاکستان پوځ په ۲۰۱۴ز کال کې په شمالي وزیرستان کې د ضرب عضب په نامه پوځي عملیات کړي ول او شاوخوا دوه کاله وروسته یې دعوه وکړه چې سیمه یې له وسلوالو پاکه کړې ده. په ۲۰۱۶ز کال کې چې لکونه بې کوره خلک سیمې ته ستانه شول نو تر څه وخت پورې امن وو خو د ۲۰۱۸ز په وروستیو کې پکې هدفي او نورې حملې پیل شوې چې له ۲۰۲۲ز کال راهیسې لا زیاتې شوې دي.