په داسې حال کې چې د پاکستان او د پیسو نړیوال صندوق چارواکي هغه هېواد ته د پور ورکولو په اړه ابتدايي توافق کړی دی، په اسلام اباد کې د امريکا سفير ډانلډ بلوم ويلي چې له پاکستان سره د اقتصادي همکارۍ لا زیاتولو لپاره پر خپلو ژمنو ولاړ دی.
پاکستان او د ای اېم اېف ماموران د مارچ پر ۲۰مه اسلام اباد ته د درې اربه امریکايي ډالرو له پوره د ۱.۱ مېلیاره ډالرو د بل قسط ورکولو په اړه ابتدايي موافقې ته ورسېدل.
د هغې نړیوالې مالي ادارې اجراییوي بورډ باید اوسنۍ موافقه تایید کړي چې ورسره سم به پاکستان پیسې ترلاسه کړي.
ای اېم اېف د مارچ پر ۲۰مه په بیان کې ویلي دي چې د پاکستان دولتي بانک او پخواني نګران حکومت په وروستیو میاشتو کې د هغې مالیاتي ادارې پر شرطونو په سختۍ عمل کړی دی او اوسنی نوی حکومت هم له اقتصادي او مالي پلوه د هېواد د باثباته او پیاوړي کولو لپاره د تګلارو او اصلاحاتي هڅو د دوام هوډ ښوولی دی.
په دې ترڅ کې د ای اېم اېف او پاکستان چارواکو ترمینځ د پور په اړه مذاکرات د مارچ پر ۱۹مه سر ته ورسېدل.
د پاکستان د ماليې وزارت ويلي چې له ای اېم اېف سره يې د مالي چارو د ارزونې غونډې پينځه ورځې دوام وکړ.
اسلام اباد او ای اېم اېف په ۲۰۲۳ز کال کې پر داسې مهال د درې اربه ډالرو د پور موافقه کړې وه چې پاکستان یو له تر ټولو سختو اقتصادي بحرانونو سره مخامخ وو.
په همدې حال کې په اسلام اباد کې د امريکا سفارت د مارچ پر ۱۹مه پر خپله ووبپاڼه په بیان کې ويلي چې بلوم پر هم هغه ورځ د پاکستان د خزانې له وزير محمد اورنګزېب سره ولیدل.
بیان وايي، دواړو مشرانو د پاکستان د اقتصادي اصلاحاتو د هدفونو پوره کولو لپاره د امريکا د لا زياتې همکارۍ او ملاتړ په اړه خبرې وکړې چې د هغه هېواد د ماليې انتظام او د پانګونې فضا لا ښه کول پکې شامل دي.
Federal Minister for Finance & Revenue Mr. Muhammad Aurangzeb was called on by H.E. Mr. Donald Blome, Ambassador of the United States & discussed matters of mutual interest, economic & financial relations between the two countries & collaborative efforts in various sectors. pic.twitter.com/7kiJnAeU10
— Ministry of Finance, Government of Pakistan (@Financegovpk) March 19, 2024
بيان پر مخ ليکي چې ډانلډ بلوم له ای اېم اېف سره د پاکستان د پور اخيستلو په لړ کې د امريکا د ملاتړ یادونه وکړه.
بلوم تر دې يوه ورځ وړاندې د پاکستان له ولسمشر اصف علي زرداري او د بهرنيو چارو له وزير اسحاق ډار سره هم په جلا، جلا ملاقاتونو کې د امريکا او پاکستان پر دوه اړخيزو اړيکو او اقتصادي او سياسي موضوعاتو خبرې کړې وې.
دا هم وګورئ:
پاکستاني چارواکي د نور پور ترلاسه کولو لپاره له ای اېم اېف سره غږېدلي ديپاکستان له ای اېم اېف څخه د څه باندې ۷۰۰ مېليونه ډالرو پور ترلاسه کړی دیپاکستان کې د روژې په رارسېدو ګراني زیاته شوې دهاروپایي ټولنه: پاکستان له ځانګړي سوداګریز پلانه ګټه اخیستې خو یو لړ ژمنې یې نه دي پوره کړېد پاکستان منتخب وزیراعظم شهباز شریف د اقتصادي او امنیتي مسلو د هواري ژمنه کړې دهد ای اېم اېف اجراییوي ډلې د ۲۰۲۳ز کال د جولای پر ۱۲مه پاکستان ته د درې اربه ډالرو نهه میاشتنی پروګرام تایید کړی وو چې ورسره سم یې هغه هېواد ته د پور لومړی قسط، چې ۱.۲ اربه ډالر جوړېده، ورکړ.
ای اېم اېف د روان کال په جنورۍ کې پاکستان ته د څه باندې ۷۰۵ مېليونه ډالرو پور قسط ورکړی وو.
دا ډول پاکستان ته د ای اېم اېف د هغه نهه میاشتني پروګرام په لړ کې ورکړل شوی پور ۱.۹ اربه ډالرو ته رسېدلی وو.
پاکستان په داسې حال کې له ای اېم ایفه د پور د تازه قسط ترلاسه کولو هڅې کوي، چې د ډالر په مقابله کې د روپۍ ارزښت پرېوتی دی، په هغه هېواد کې د بهرنیو اسعارو یا پیسو زېرمې کمې شوې دي، انفلېشن یا افراط زر ۲۳ سلنه لوړه شوې او د دولتي بانک پر پورونو د سود سطح ۲۲ فیصده ته رسېدلې ده.
پاکستان له ۲۰۱۹ز کال راهیسې له اقتصادي بحران سره مخامخ دی او پر هم هغه کال یې د پیسو له نړیوال صندوق سره د شپږو اربو ډالرو د پور درې کلن تړون لاسلیک کړی وو.