د ملي جمهوري غورځنګ (اېن ډي اېم) غړو او پلویانو د شمالي وزیرستان په میرلي کې په بمونو د نجونو د ښوونځیو الوځولو پېښو پرضد لاریون کړی دی او له حکومته یې غوښتي دي چې ککړ کسان د قانون منګولو ته وسپاري.
د مې ۲۵مې احتجاجي لاریون تر هغې وروسته شوی دی چې د مې پر ۲۱مه شپې مهال وسلوالو د میرلي په موسکي او حسوخېلو کې د نجونو د دوو ښوونځیو ودانۍ په بارودو والوځولې.
تر اوسه معلومه نه ده چې هغه چاودنې چا کړې دي او هېڅ یوې وسلوالې ډلې یې ذمه واري نه ده منلې.
د تعلیم ادارې چارواکي وايي، د مینځنیو زده کړو په هغو ښوونځیو کې تر ۵۰۰ زیاتې شاګردانې داخلې دي.
مظاهرچیانو په لاسونو کې بینرونه اخیستي ول او د تعلیم په حق کې یې شعارونه ورکول.
د ملي جمهوري غورځنګ د اطلاعاتي چارو صوبايي سېکرټر جمال داوړ تر لاریون وروسته مشال راډیو ته وویل، له حکومته غواړي چې نه یوازې دې هلته د ښوونځیو ساتنه وکړي بلکې نور سکولونه دې هم جوړ کړي. "پوهه رڼا ده او له ریاسته غوښتنه کوو چې د [نوي] کهول مستقبل چې له زده کړو سره تړلی دی، دې خوندي شي. دلته شته ادارې دې نه ړنګېږي، بلکې نورې دې زیاتې شي."
دا هم وګورئ:
په شمالي وزیرستان کې ۲ سکولونه په بمونو الوځول شوي ديشمالي وزیرستان کې ځانمرګي برید د سرتېرو په ګډون ۴ تنه وژلي ديشمالي وزیرستان: پوځ وايي د مشکوکو وسلوالو شپږ کورونه يې ړنګ کړي ديپوځ او وسلوالو په شمالي او جنوبي وزیرستانونو کې یو بل ته د مرګژوبلې اړولو دعوې کړې ديپه شمالي وزیرستان کې د اېن ډي اېم مشر اسد داوړ مشال راډیو ته وویل، د مظاهرې له لارې یې د ښوونځیو ودانیو د ړنګولو د تحقیقاتو غوښتنه وکړه. "د نجونو سکولونه چې ړنګېږي نو دا پر تعلیم حمله ده. دلته [ځینې] قوتونه غواړي چې تیاره وي، خلک پوهه ترلاسه نه کړي."
مظاهرچیانو له ضلعي انتظامیې څخه په شمالي وزیرستان کې د امنیت ټینګښت غوښتنه وکړه.
د شمالي وزیرستان انتظامیې د لاریونوالو د څرګندونو په اړه لا څه نه دي ویلي خو د ضلعې د پولیسو مشر سلیم ریاض د مې پر ۲۲مه مشال راډیو ته ویلي ول چې د پېښې پلټنې یې پیل کړې دي او د نامعلومه وسلوالو پرضد یې مقدمه دایره کړې ده.
داراز، په سیمه کې یو پوځي افسر له رسنیو سره د خبرو اجازې نه لرلو له کبله د نوم نه ښوولو په شرط مشال راډیو ته ویلي دي چې د مشکوکو وسلوالو لټون یې پیل کړی دی. هغه چارواکي د مې پر ۲۴مه په خبرو کې زیاته کړه چې د ښوونځیو ودانیو په ړنګولو کې د ککړو کسانو پرضد سخت اقدامات کوي.
دا په داسې حال کې ده چې د ۲۰۲۲ز کال له اوړي راهیسې د شمالي وزیرستان په ګډون د خیبر پښتونخوا په یوشمېر برخو کې ناامني زیاته شوې ده چې پرضد یې د هغې صوبې ولسي وګړو، سیاستوالانو او فعالانو پراخې مظاهرې، جرګې او لاریونونه کړي دي.
په همدې حال کې پولیسو او امنیتي ځواکونو هم د وسلوالو پرضد عملیاتو ته دوام ورکړی دی. د پاکستان د پوځ ویاند جنرال احمد شریف چودري د اپرېل پر ۲۵مه په راولپېنډۍ کې یوې خبري غونډې ته وویل، په پاکستان کې پوځ، پولیس او نورې امنيتي ادارې هره ورځ تر ۷۰ زيات عمليات کوي.