چارواکي وايي چې په خیبر پښتونخوا کې یې په درو کسانو کې د بیزو تڼاکو یا دانو (منکيپاکس یا اېم پاکس) ناروغۍ وایرس موندلی دی.
د صوبې د روغتیايي خدماتو مشر سلیم خان رسنیو ته ویلي دي چې د اګست پر ۱۶مه په دوو کسانو او تر دې یوه ورځ مخکې په یو کس کې وایرس تایید شوی وو.
دی وايي چې درېواړه کسان یې قرنطین کړي دي او زیاتوي چې د څلورم مشکوک ناروغ د دانو نمونې یې د تشخیص لپاره په اسلام اباد کې د روغتیا ملي مرکز (نیشنل انسټېټیوټ اف هېلت یا اېن ای اېچ) ته لېږدولې دي.
د خیبر پښتونخوا د روغتیا وزارت وايي چې درېواړه ناروغان په وروستیو کې له متحده عربي اماراتو څخه هېواد ته ستانه شوي ول.
اخوا د پاکستان د روغتیا وزارت یو ویاند د اګست پر ۱۵مه په اسلام اباد کې خبریالانو ته وویل چې په یو بل پاکستاني وګړي کې هم وایرس موندل شوی دی خو د وایرس بڼې د تعین لپاره معاینه روانه ده.
ستاسې سېسټم د HTML5 په چلولو کې ستونزه لري.
د منکيپاکس په نوم ناروغي څنګه خپرېږي؟
دا په داسې حال کې ده چې د روغتیا نړیوال سازمان (ډبلیو اېچ او) د اګست پر ۱۴مه په کانګو جمهوریت او نورو افریقايي هېوادونو کې د اېم پاکس وایرس د پېښو زیاتېدو خبر ورکړ او دا یې پر نړیوال کچ د "عامې روغتیا" لپاره "د اندېښنې وړ او بیړنۍ" موضوع وبلله.
د سازمان چارواکو د اګست پر ۱۵مه په سویډن کې هم د وایرس نوې بڼه تایید کړه او و یې ویل چې ښايي سرچینه یې افریقا وي.
د ۲۰۲۳ز کال په جنورۍ کې د اوسنۍ وبا له پیل راهیسې په کانګو جمهوریت کې ټول ۲۷،۰۰۰ کسان په وایرس اخته شوي او تر ۱،۱۰۰ زیات کسان، چې لوی شمېر یې ماشومان دي، یې وژلي دي.
د روغتیا نړیوال سازمان پر ووبپاڼه لیکل شوي چې د اېم پاکس په وایرس اخته ناروغانو پر وجود ټناکو ته ورته دانې پیدا کېږي، تبه لري، سر، د عضلاتو او ملا درد لري، ستوماني محسوسوي او د لېمفاټېک نظام، چې د ناروغیو پر وړاندې د مدافعت دنده ترسره کوي، غوټې یې پړسېږي.
سازمان وايي چې د اېم پاکس وایرس له یو کسه بل ته خپرېدای شي نو ځکه ناروغان باید ګوښه کړل شي.