پولیس وايي، د خیبر پښتونخوا په نوښار کې په وسلوال برید کې درې پولیسان وژل شوي دي.
د خیبر پښتونخوا پولیسو ویلي چې برید د ډېسېمبر پر درېیمه په اکوړي کې د پولیسو د ګزمې پر مهال شوی دی.
پولیسو د ډېسېمبر پر درېیمه پر ټوېټر په بیان کې ویلي دي چې وسلوال پر موټرسایکل سپاره ول.
نوشہرہ پولیس کے بہادر سپوتوں نے فرض کی راہ میں مادر وطن پر جان نچھاور کردی۔ تھانہ اکوڑہ خٹک چوکی سوڑیاخیل پولیس موبائل پر دھشتگردوں کی فائرنگ سے 3 پولیس اہلکار ہیڈ کانسٹیبل منظور، کانسٹیبل امان اللہ اور ڈرائیور کانسٹیبل ایاز شہادت کے عظیم مرتبے پر فائز ہوگئے۔ pic.twitter.com/bfmt6qeuux
— KP Police (@KP_Police1) December 3, 2022
بیان زیاتوي چې په حمله کې درې سرتېري منظور، ایاز او امان الله ووژل شول.
د خیبر پښتونخوا اعلاوزیر محمود خان پر ټوېټر په بیان کې د حملې غندنه کړې ده او د پولیسو له مشره یې د پېښې رپورټ غوښتی دی.
د حملې ذمه واري تحریک طالبان پاکستان (ټي ټي پي) منلې ده.
دا تر هغې وروسته ده چې هغې ناقانونه وسلوالې ډلې د نومبر پر ۲۸مه په پاکستان کې د حملو بیا پیلولو اعلان وکړ.
ټي ټي پي رسنيو ته په استولي بیان کې، چې مشال راډیو هم ترلاسه کړی، دعوه کړې وه چې "د پاکستان پوځ" یې "په لکي مروت او نورو سيمو کې" پرضد عملیاتو ته دوام ورکړی دی ځکه بیا حملې پیلوي.
تحریک طالبان پاکستان تر دې اعلان دوه ورځې وروسته د بلوچستان په مرکز کوټه کې د پولیسو د کانسټیبلري ځواک پر ګاډي د بمي برید ذمه واري ومنله. په هغه حمله کې لږترلږه څلور کسان وژل شوي ول.
ستاسې سېسټم د HTML5 په چلولو کې ستونزه لري.
کوټه کې د پولیسو پر ګاډي برید شوی دی
تر دې وروسته، هغې ډلې په جنوبي وزیرستان کې د یوې غونډې پر مهال د نجونو پر ښوونځي د ډزو ذمه واري ومنله. د ډېسېمبر لومړۍ نېټې په پېښه کې یو ځايي وګړی ووژل شو او یو پوځي سرتېری ټپي شو.
د یادونې وړ ده چې تحریک طالبان پاکستان او اسلام اباد د جون پر لومړۍ نېټه دوه اړخیز اوربند غځولی وو خو پر هغې سربېره د خیبر پښتونخوا په بېلابېلو ضلعو کې ناامني زیاته شوه.
د پاکستان د کورونيو چارو وزير رانا ثنا الله د ډېسېمبر پر لومړۍ نيټه په اسلام اباد کې د خبري غونډي پر مهال د ټي ټي پي پر بریدونو اندېښنه وښووله خو زیاته یې کړه چې د هغو وسلوالو پرضد به کاروايي کوي چې خبرو ته نه اماده کېږي.