واشنګټن په افغانستان کې د طالبانو حکومت پر يوشمېر چارواکو د امریکايي ویزو بنديزونه اعلان کړي دي.
د امريکا د بهرنيو چارو وزارت د اکتوبر پر ۱۱مه د ماشومانو نجونو د نړيوالې ورځې په مناسبت په خبرپاڼه کې ويلي چې د ویزو په محدودیت کې د طالبانو هغه ټول اوسني او پخواني غړي او نور هغه کسان هم شامل دي چې پر ښځو او نجونو د محدودیتونو لګولو په تګلارو کې ښکېل دي.
د وزارت په اعلاميه کې راغلي چې د طالبانو له خوا پر افغان مېرمنو په لګول شویو محدودیتونو کې له شپږم ټولګي پورته د نجونو ښوونځیو تړل، په کاري برخه کې د ښځو د بشپړ ګډون او د دندې د غوره کولو لپاره د دوی د وړتیا مخنیوی، د مېرمنو د خوځښت، بیان او محرمیت محدودول او همدا ډول د هغو مېرمنو او نجونو د کورنیو د غړو ناقانونه نیول او زنداني کول شامل دي چې د طالبانو د حکومت توپیري تګلارو ته غاړه نه ږدي.
د طالبانو حکومت د واشنګټن د تازه اقدام په غبرګون کې لا څه نه دي ویلي.
د امریکا د بهرنیو چارو وزیر اینتني بلېنکن له نورو هېوادونو هم د ورته ګام غوښتنه او ټینګار کړی چې په افغانستان کې "یوازې هغه حکومت، چې د ټولو خلکو استازیتوب" او د خپلو "ټولو وګړو د بشري حقونو ساتنه او پالنه" کولای شي، "مشروع" ګڼل کېدای شي.
بلېنکن په خپل ټويټ کې لیکلي دي چې هېواد یې پر هغو کسانو د بندیزونو لګېدو لپاره اقدام کوي چې په افغانستان کې د مېرمنو او نجونو په ځپلو کې لاس لري.
نوموړي زیاته کړې چې پر طالبانو به فشار ته دوام ورکړي چې د نجونو د تعلیم، د مېرمنو د حقونو په ګډون بشري حقونو او بنسټیزو ازادیو ته درناوی وکړي.
طالبانو تر اوسه د امريکا له خوا د ویزو د محدودیتونو د تازه اقدام په اړه څه نه دي ویلي خو تر دې مخکې یې له واشنګټنه پر خپلو مشرانو او غړو د بندیزونو د لیرې کېدو غوښتنه کړې وه.
د ماشومانو نجونو د نړيوالې ورځې په مناسبت د ملګرو ملتونو عمومي منشي انتونيو ګوتېرش هم یوځل بیا پر طالبانو غږ کړی چې نجونو ته د تعلیم اجازه ورکړي.
نوموړي د اکتوبر پر ۱۱مه پر خپله ټوېټر پاڼه ليکلي چې هغه په افغانستان کې له ښوونځيو څخه د نجونو د محرومېدو د دوام په اړه "سخت اندېښمن" دی.
نوموړي زياته کړې چې له تعلیمه د نجونو د بې برخې کولو زیان هم "افغان نجونو ته رسي او هم افغانستان ته"، چې د نجونو انرژۍ او ونډې ته "سخته اړتیا" لري.
طالبانو د ۲۰۲۱ز کال په اګست میاشت کې پر افغانستان تر واکمنېدو وروسته تر شپږم ټولګي پورته د نجونو ښوونځي تړلې دي. د نجونو پر تعلیم بندیز هغه يوه تر ټولو لويه ستونزه ده چې د طالبانو حکومت یې له نړیوالې ټولنې سره په لانجه اړولی دی.
دا هم وګورئ:
طالبانو کندهار کې ۱۳ کلنې او زيات عمر لرونکې نجونې له ښوونځيو ایستلي ديهیدر بار: طالبان د نجونو د ښوونځيو په بند ساتلو د افغانستان راتلونکې تياره کويملاله فنډ: نړيوال مشران دې د افغان نجونو د زده کړو لپاره پر طالبانو فشار زيات کړيملګري ملتونه وايي په افغانستان کې حالات استبدادیت خوا ته روان ديپه افغانستان کې دا مهال له درو مېلیونو زیاتې نجونې ښوونځيو ته د تګ اجازه نه لري. افغان نجونو او مېرمنو په وار وار غوښتنه کړې چې هغوی دې تعلیمي ادارو ته پرېږدي.
په افغانستان کې دننه او دباندې ګڼو خلکو پر ټولنیزو رسنیو د طالبانو د حکومت پر دغه ګام "سختې نيوکې" کړې دي.
د طالبانو په حکومت کې دننه هم یوشمېر چارواکي د نجونو ښوونځيو پرانيستلو په حق کې دي خو ځينې سختدريځه مشران د دې ګام مخالفت کوي.
له همدې امله د طالبانو د حکومت وياند ذبيح الله مجاهد په بیا بیا ويلي چې د نجونو ښوونځيو ته د تګ په اړه پر يوې تګلارې جوړولو کار روان دی او "ډېر ژر" به د نجونو پرمخ د ښوونځيو دروازې پرانيستل شي، خو تر يو کال زيات وخت تېرېدو وروسته لا هم نجونې له تعليمه محرومه دي.