د پاکستان پلانونو او پرمختيا وفاقي وزير اسد عمر وايي، په تېره يوه ورځ کې يې تر ۳۸۳،۰۰۰ زياتو کسانو ته د کووېډ-۱۹ واکسين ورکړي چې يو رېکارډ دی.
اسد عمر د مې پر ۳۰مه پر ټوېټر ليکلي چې په هېواد کې په مجموعي توګه تر اووه میلیونه کسان واکسين شوي دي او د دې ترڅنګ د کووېډ-۱۹ واکسين لپاره د نوم ليکنې شمېر هم په دوامداره توګه لوړېږي.
الحمدللہ کل ایک دن میں ویکسینیشن کا نیا ریکارڈ قائم کیا گیا. کل 3 لاکھ 83 ہزار سے زائد ویکسینیشن کی گئ. اب تک 70 لاکھ سے ویکسین لگائ جا چکی ہے. رجسٹر کرنے والوں کی تعداد میں بھی مسلسل اضافہ ہو رہا ہے اور ا کروڑ 16 لاکھ 63 ہزار افراد رجسٹر ہو چکے ہیں
— Asad Umar (@Asad_Umar) May 30, 2021
عمر زياتوي، په ټول ملک کې ۱۱،۶۶۳،۰۰۰ کسانو د کووېډ-۱۹ واکسين لپاره نومونه ثبت کړي دي.
نوموړي دا څرګندونې پر داسې مهال کړې دي چې پاکستان هڅه کوي چې په پړاوونو کې د هېواد ټول وګړي واکسین کړي.
حکومت د مې له ۲۹مې څخه تر ۱۸ کلونو زیات عمر لرونکو ته د کووېډ-۱۹ واکسینو ورکولو بهیر پیل کړ.
د پاکستان حکومت درې چینايي واکسینونه (سینوفارم، کینسینو او سینو ویک)، د روسیې سپوتنیک وي او د برتانیې استرازېنېکا منظور کړي او وګړو ته یې ورکوي.
دا په داسې حال کې ده چې په پاکستان کې په تېرو ۲۴ ګېنټو کې د کورونا وايرس ناروغۍ له وجې ۵۶ کسان مړه شوي دي. له دې سره د ټولو مړو شويو کسانو شمېر ۲۰،۷۳۶ ته رسېدلی دی.
د کورونا وايرس وبا په اړه حکومتي ووبپاڼه وايي، د مې ۳۰مې تر سهاره د کورونا وايرس ټولو مثبتو پېښو شمېر ۹۱۸،۹۳۶ ته رسېدلی دی. خو له دې ناروغۍ ۸۳۹،۳۲۲ کسان رغېدلي هم دي.
بلخوا د کورونا وایرس وبا د څار ادارې (نېشنل کمانډ اېنډ اپرېشن سېنټر) د مې پر ۲۸مه په اسلام اباد کې پرېکړه وکړه چې د لسم او دولسم جماعتونو امتحانونه له جون ۲۳مې تر جولای ۲۹مې پورې وي.
په غونډه کې دا هم وویل شول چې صوبې د امتحانونو د تیاري لپاره د مې له ۳۱مې څخه د لسم او دولسم سبقونه، د احتیاطي لارښوونو په عملي کولو، پیلوي.