طالبان وايي، د کابل د عیدګاه جومات له وره سره نېږدې چاودنه شوې چې پکې یوشمېر کسانو ته مرګ ژوبله اوښتې.
په سیمه کې د مشال راډیو خبریال د طالبانو په حواله وايي چې د اکتوبر پر درېیمه ماسپښین مهال په چاودنه کې لږ تر لږه دوه ملکي وګړي وژل شوي او درې ژوبل دي.
اخوا د طالبانو د سرپرست حکومت ویاند ذبیح الله مجاهد پر ټوېټر په بیان کې لیکلي چې چاودنه "د ملکي خلکو" په یوه غونډه کې شوې.
نوموړي په خپل بیان کې د مرګ ژوبلې په اړه معلومات نه دي ورکړي البته یوازې یې ویلي چې په پېښه کې "یوشمېر ملکي هېوادوالو ته تلفات" اوښتي دي.
هلته د طالبانو د حکومت د کورنیو چارو وزارت یوه ویاند قاري سعید خوستي مشال راډیو ته ویلي چې له جومات سره نېږدې درې مشکوک کسان له پېښې سره د تړاو په تور نیول شوي دي.
په کابل کې چاودنه پر داسې وخت شوې ده چې له رپورټونو سره سم، په عیدګاه جومات کې د طالبانو د ویاند ذبیح الله مجاهد د مور فاتحه روانه وه.
مجاهد د اکتوبر پر دویمه رسنیو ته په استولي بیان کې ويلي ول چې د یکشنبې د ماسپښین له دوو څخه تر پینځو بجو پورې به یې د مور فاتحه اخیستل کېږي.
د مشال راډیو خبریال وايي، تر پېښې وروسته طالبانو په سیمه کې هوايي ډزې هم کړې دي. د کابل له عیدګاه جومات سره د چاودنې ذمه واري چا نه ده منلې.
د ۲۰۲۱م کال د اګست پر ۱۵مه پر افغانستان د طالبانو تر واکمنېدو وروسته که څه هم جګړه پای ته رسېدلې ده خو د کابل په ګډون په ځینو سیمو کې چاودنې او بریدونه ترسره کېږي.
د اکتوبر پر دویمه د ننګرهار ولایت په جلال اباد ښار کې نامعلومو وسله والو د خبریال او لیکوال سید معروف سادات په ګډون څلور کسان ووژل.
عيني شاهدانو مشال راډیو ته ويلي چې د اکتوبر پر دویمه مازيګر د جلال اباد په واټر پمپ سيمه کې په ريکشا کې سپاره بريدګرو پر ټوډي ډوله موټر برید وکړ او وتېښتېدل.
په څلورو وژل شويو کې ليکوال او د "صبح بخیر او ماښام پخیر" راډیو پخوانی خبریال سید معروف سادات هم دی.
نوموړی په وروستیو کې د ننګرهار د کلیو او پراختیا په ریاست کې د مطبوعاتو مسول وو او له ځینو بهرنیو رسنیو سره یې هم همکاري درلوده.
تر اوسه معلومه نه ده چې دا برید چا کړی دی او نه هم د طالبانو د حکومت چارواکو په دې اړه څه ويلي دي.
تر دې وړاندې د سېپټمبر پر ۲۵مه په جلال اباد ښار کې چاودنې یو طالب وژلی او د څلور ولسي وګړو په ګډون یې اووه تنه ټپي کړي وو..
دا پېښه د جلال اباد ښار امیر شهید بڼ ته نېږدې په ګلدان کې د ځای پر ځای شویو چاودېدونکو توکو د چاودنې له امله رامنځته شوې وه.
د سېپټېمبر پر ۲۲مه هم د جلال اباد ښار اوومې ناحیې په مربوطاتو کې په ریکشه کې سپرو ناڅرګنده وسله والو د تېلو پمپ کې درې تنه په ډزو وژلي وو.
د ننګرهار په اطلاعاتو او فرهنګ ریاست کې د مطبوعاتو مسوول قاري عرفات مهاجر خبریالانو ته په یو لیکلي پېغام کې د پېښې پخلی کړی وو خو نور معلومات یې نه وو ورکړي.
خو د پېښې یو عیني شاهد د نوم نه ښوولو په شرط مشال راډیو ته ویلي وو چې په وژل شويو کې دوه تنه طالبان او یو تن د تـېلو د پمپ کارکوونکی وو.