د طالبانو حکومت د کورنیو چارو وزارت وايي، د اکتوبر پر پينځمه له غرمې وروسته د دې وزارت په یوه فرعي جومات کې دننه د چاودنې له امله څلور کسان وژل شوي او ۲۵ ژوبل شوي دي.
د طالبانو حکومت د کورنیو چارو وزارت ویاند عبدالنافع ټکور پرون (د اکتوبر پر پينځمه) تر پېښې وروسته وویل: "په تاسف سره باید ووایو چې نن له غرمې وروسته شاوخوا یوه نیمه بجه د کورنیو چارو وزارت په یوه فرعي جومات کې چاودنه رامنځته شوه. په یاده چادنه کې ۴ تنه لمونځ کوونکي په شهادت ورسېدل او ۲۵ تنه نور هم زخمیان دي. دپېښي په اړه پلټنې روانې دي چې کله پلټنې پای ته ورسېدې، جزییات به یې له رسنیو سره شریک کړو."
نوموړي له دې څو ساعته مخکې ویلي ول چې د کورنیو چارو وزارت ته څېرمه په یوه جومات کې دا چاودنه شوې ده چې هلته د کورنیو چارو د وزارت ځینې کارکوونکي هم لمونځ کوي.
تر دې وړاندې په کابل کې د اېټالیې په مرسته چلېدونکي اېمرجنسي روغتون د اکتوبر پر پینځمه پر ټوېټر په بیان کې ویلي ول چې د پېښې له ځایه ۲۰ کسان وروړل شوي چې ورڅخه یې دوه تر رسېدو مخکې مړه شوي ول.
🔴#Kabul: After a bomb attack in a mosque at the Interior Ministry, EMERGENCY NGO Surgical Centre has received 20 patients - 2 were already dead on arrival. This is the 2nd mass casualty the hospital has handled in recent days, and the 23rd of the year so far.#Afghanistan pic.twitter.com/Fw2lJUHZPZ
— EMERGENCY NGO (@emergency_ngo) October 5, 2022
روغتون پر ټوېټر په بل بیان کې د مرګژوبلې زیاتېدو وېره ښوولې ده.
دا پېښه پر داسې مهال شوې چې د سېپټېمبر پر ۳۰مه په کابل کې پر یوه ښوونیز مرکز تر برید وروسته د افغانستان په یوشمېر ولایتونو کې پراخې مظاهرې وشوې.
په کابل کې د ملګرو ملتونو مرستندویه ماموریت (يوناما) د اکتوبر پر درېيمه وویل چې د پلازمېنې په لویدیځ کې پر "کاج ښوونیز مرکز" په برید کې د وژل شویو شمېر ۴۳ ته رسېدلی او ۸۳ ټپیان دي.
د طالبانو حکومت وايي، برید د کانکور اموزینې لپاره د تیاري پر مهال شوی دی. د حکومت په خبره، پر کاج ښوونيز مرکز یې د بريد په تړاو یو مشکوک کس نیولی او پلټنې یې پیل کړې دي.
د هغه برید ذمه واري تر اوسه لا چا نه ده منلې خو مخکې د کابل په لوېدیځ دشت برچي سيمه کې، چې زياتره شیعه هزاره ګان پکې مېشت دي، د یوشمېر ذمه واري د اسلامي دولت (داعش) وسله والې خراسان څانګې منلې وه.
ستاسې سېسټم د HTML5 په چلولو کې ستونزه لري.
پر کاج ښوونيز مرکز د برید د قربانيانو د کورنيو وير
له دې پرته، د ۲۰۲۱ز کال په اګست کې پر افغانستان د طالبانو له واکمنېدو راهیسې پر جوماتونو، امام بارګاهو او د لږکیو پر عبادت ځایونه هم یوشمېر بریدونه شوي دي چې د اکثریت ذمه واري داعش منلې.
د سېپټېمبر پر ۲۳مه په کابل کې د وزیر محمد اکبر خان له جومات سره نېږدې په چاودنه کې اووه کسان وژل شوي او ۴۱ ژوبل شوي ول. د هغې حملې ذمه واري چا نه وه منلې.
د سېپټېمبر پر ۲۱مه له یوه رستوران سره نېږدې په چاودنه کې درې کسان ووژل او ۱۳ ژوبل شول. یوشمېر کسانو ویلي ول چې پېښه د ګیس سیلېنډر یا ډبې د چاودېدو له وجې شوې وه خو طالب چارواکو ویلي ول چې په اړه یې پلټنې کوي.
تر دې مخکې د سېپټېمبر پر پینځمه په کابل کې د روسیې سفارت پر ودانۍ په ځانمرګي برید کې دوه روسي کارکوونکي او څلور افغانان وژل شوي ول. د اسلامي دولت (داعش) خراسان څانګې د هغې حملې ذمه واري منلې وه.
دا هم وګورئ:
ملګري ملتونه: د افغانستان په هېڅ ځای کې نجونې او ښځې خوندي نه ديطالبان: پر کاج ښوونيز مرکز مو د بريد په تړاو مشکوک تن نيولی کابل: وزير اکبر خان کې د شوې چاودنې د مړيو شمېر اوو ته رسېدلیافغانستان کې د کابل بريد ضد مظاهرې شوې ديد مزارشریف په چاودنه کې د وژلیو شمېر ۲۵ ته ورسېدپه ۲۰۲۰ز کال کې هم د کوثر دانش په نوم د کابل په لوېدیځ کې پر یوه ښوونیز مرکز په خونړي بريد کې لږترلږه ۲۴ زده کوونکي وژل شوي او شاوخوا ۶۰ نور ژوبل شوي ول.
د طالبانو حکومت وايي، د داعش ډلې پرضد یې عملیاتو او اقداماتو ته دوام ورکړی دی او په تېرو میاشتو کې یې د یوشمېر مشکوکو وسله والو د وژنې دعوې هم کړې دي.