په قبایلي ضلع کورمه کې د شپږو قامونو خلکو د ګیدو پر اوسېدونکو د لارې تړلو پروړاندې او د نورو غوښتنو پوره کېدو لپاره احتجاجي پرلت وهلی دی.
د ډېسېمبر پر ۲۲مه منګلو، خروټو، ځدران غلزیو، مقبلو او ځاځیو په خوار کلي، پیر قیوم او ساتین کې د سړک پر غاړه ناسته پیل کړه او د ټل او پاړه چنار ترمینځ لاره یې وتړله.
دوی د یوشمېر غوښتنو تر پوره کېدو پورې د احتجاج د دوام ګواښ کړی دی.
د پرلتوالو یو مشر ملک منور خان د ډېسېمبر پر ۲۲مه مشال راډیو ته وویل، د ګیدو د لارې بیا پرانیستل، د پیواړو له علیزیو سره د سولې موافقې عملي کېدل او د دې لپاره په جرګه کې د دیني عالمانو ګډون، له افغانستان سره د کورمې د نورو ټرانزېټي لارو پرانیستل او د امنیت ضمانت یې غوښتنې دي.
په کورمه کې دې شپږو قومونو له شاوخوا یوې میاشت راهیسې په پیر قیوم سیمه کې پرلت وهلی وو او وايي چې غوښتنې یې و نه منل شوې نو احتجاج یې نورو سیمو ته وغځاوه.
هغو خلکو یوه میاشت مخکې تر هغې وروسته احتجاج پیل کړ چې د پیواړو علیزیو د ګیدو پر خلکو د پاړه چنار لاره وتړله.
د پیواړو یو مشر حاجي اصغر حسین مشال راډیو ته وویل، د ګیدو منګلو ورباندې په ځنګله کې د لرګیو پر وهلو بندیز لګولی نو ځکه یې لاره وتړله.
موږ په دې اړه د کورمې له انتظامي مشر ډاکتر افاق وزیر سره د رابطې هڅه وکړه خو د هغه د بوختیاوو له وجې ورسره په خبرو و نه توانېدو. البته په قامي اسمبلۍ کې د سیمې استازی ساجد حسین توری وايي، د دواړو خواوو ترمینځ د لانجې هواري لپاره جرګه روانه ده.
توري د ډېسېمبر پر ۲۲مه مشال راډیو ته وویل، "ډېر ژر به مثبته فیصله" وشي.
دا شخړه د اکتوبر پر ۲۳مه د علیزیو او منګلو ترمینځ له ګیدو سره نېږدې له ځنګله څخه د لرګیو وړلو پر سر د نښتې له وجې لا ژوره شوه. دواړه خواوې د هغه ځنګله د ملکیت پر سر اوږدمهاله لانجه لري.
په اکتوبر کې د وسله والې نښتې له وجې د دواړو خواوو ۱۶ کسان ووژل او تر ۱۵ زیات ژوبل شول.
په عین حال کې د ځنګله د ملکیت په اړه په عدالت کې هم قضیه روانه ده چې لا نه ده فیصله شوې.