د پاکستان انتخاباتو کمېشن په خيبر پښتونخوا کې د بلدیاتې انتخابانو د دویم پړاو د ځنډولو اعلان کړی دی او وايي، ټاکنې د مارچ پر ۲۷مه کوي.
په صوبه کې د انتخاباتي کمېشن ویاند سهېل احمد د جنورۍ پر پينځمه مشال راډيو ته وويل چې ټاکل شوې وه چې په پاتې ضلعو کې د جنورۍ پر ۱۶مه د دویم پړاو انتخابات وشي خو ګڼو ګوندونو یې د سړو او واورې ورېدو له وجې د ځنډولو غوښتنه وکړه.
ده زیاته کړه چې له ۱۸ ضلعو څخه یې اکثره غرنۍ سیمې دي او خلک په واورو کې د رایو کارونو لپاره مرکزونو ته نه شي ورتللای.
د خیبر پښتونخوا د درو قبایلي سیمو خیبر، مومند او باجوړ په ګډون په ۱۷ ضلعو کې د ډېسېمبر پر ۱۹مه د بلدیاتي انتخاباتو لومړی پړاو ترسره شو چې پکې خلکو د تحصیلونو، کلیو، چم ګاونډونو شوراګانو او ښاروالیو او همداراز د ښځو، کروندګرو، ځوانانو او لږکیو استازي منتخب کړل.
د انتخاباتو پر مهال په ځینو ځایونو کې د تاوتریخوالي پېښې هم وشوې. پر هغه ورځ په کرک، باجوړ او خیبر کې د ناامنیو په پېښو کې لږترلږه څلور کسان ووژل شول.
د انتخاباتو نتیجې ښيي چې په صوبه کې تر ټولو زیاتې څوکۍ د اپوزیشن جمعیت علمای اسلام (ف) ګوند ګټلې دي او واکمن تحریک انصاف ورپسې پر دویم نمبر دی. له دې پرته، د عوامي نیشنل ګوند، پاکستان مسلم لیګ (ن)، پیپلز ګوند او جماعت اسلامي په ګډون یوشمېر نورو ګوندونو هم څوکۍ وګټلې او ځینې خپلواک نوماندان هم منتخب شول.
په ۲۰۱۸ز کال کې په خیبر پښتونخوا د قبایلو تر ورګډېدو وروسته دا لومړی ځل دی چې هلته د ټیټې سطحې حکومتي ادارو لپاره انتخابات کېږي.
تر دې مخکې، په ۲۰۱۹ز کال کې د اووه واړه قبایلي ضلعو او د شپږو نیمه قبایلي ضلعو خلکو د خیبر پښتونخوا صوبايي اسمبلۍ ته خپل استازي منتخب کړل.
په هغې صوبې تر ګډېدو مخکې د قبایلي سیمو خلکو یوازې د پاکستان د قامي اسمبلۍ لپاره خپل استازي ټاکل او په سېنېټ کې یې ځانګړې څوکۍ لرلې.
