په کورمه کې د ځنګله پر سر د پیواړ د علیزیو او د ګېدو د منګلو ترمینځ تر شاوخوا دوو ورځو نښتو وروسته اوربند شوی دی.
د ضلعې انتظامي مشر ډاکتر افاق وزیر د اکتوبر پر ۲۴مه شپې ناوخته مشال راډیو ته وویل، د سیمې د مشرانو یوې جرګې له دواړو خواوو سره خبرې وکړې او هغوی د مورچو په پرېښوولو سلا شول چې تر هغې وروسته د اتوار/یکشنبې پر مازیګر نښته وردېده.
نښته د اکتوبر پر ۲۳مه سهار شاوخوا ۱۰ بجې هغه مهال پیل شوه چې علیزي له ګېدو سیمې سره نېږدې په ځنګله کې د لرګیو وهلو لپاره ورغلل.
تر اوسه معلومه نه ده چې نښته څنګه پیل شوه، خو چارواکي وايي، د دواړو خواوو کسان په وسلو سمبال ول.
د کورمې انتظامیه وايي، په نښته کې د دواړو لورویو د وژل شویو شمېر ۱۱ ته رسېدلی او ۱۲ کسان ژوبل دي.
د سیمې د مشرانو د جرګې یوه غړي ملک سلیم خان اورکزي د اکتوبر پر ۲۴مه شپې مهال مشال راډیو ته وویل، غونډو ته دوام ورکوي او له فریقینو څخه بیا د نه جنګېدو ضمانت اخلي.
د جګړې پر درېدو سربېره په کورمه کې حالات عادي شوي نه دي او لویې لارې لا هم تړلې دي او انتظامیې د موبایل ټېلېفون شبکې بندې کړې دي.
د پاړه چینار ملک عطاالله مشال راډیو ته وویل، که حکومت ژر تر ژره حالات عادي نه کړل نو د سیمې ولس له ستونزو سره مخامخېدای شي.
خو ډېپټي کمېشنر افاق وزیر وايي، د ټل او پاړه چینار عمومي لار یې د تګ راتګ لپاره بیا پرانیستې خو د تري منګلو او پاړه چینار ترمنځ سړک د احتیاط په موخه لا نه خلاصوي.
دی همداراز زیاتوي چې د موبایل ټېلېفون سروېس یې په جزوي ډول بحال کړی او چې کله "هر څه کنټرول شي" نو بیا به یې د بشپړې بحالۍ امر وکړي.
د ګېدو سیمې پر ځنګله د پیواړ د علیزیو او د غونډيخېلو له منګلو سره پخوانۍ لانجه ده چې له وجې یې مخکې هم نښتې شوې دي.
خو دا لومړی ځل نه دی چې په کورمه کې د ځمکې پر سر د لانجې له وجې نښته کېږي. د ۲۰۲۰ز کال د جون په پای کې په کورمه کې د ابراهیمزیو او بالشخېلو خلکو او پاړه څمکنیو ترمنځ د مرغې چینې ځمکې لانجې پر سر نښته وشوه.
له کورمې پرته، په جنوبي وزیرستان، شمالي وزیرستان او د باجوړ او مومندو ترمنځ د پولې په ګډون د شاملاتو د ځمکو پر هم لسګونه لانجې دي چې کله نا کله د نښتو لامل کېږي.
د قبایلي ضلعو ولسونو ځینې لانجې په خیبر پښتونخوا د قبایلو تر ورګډېدو وروسته عدالتونو ته وړې دي.
د هغو سیمو انتظامي مشران او چارواکي وايي، له ولسي مشرانو سره د جرګو له لارې د لانجو د هواري هڅې کوي.
