په قبایلی سیمه کورمه ایجنسۍ کې انتظامي چارواکي وايي چې د خوړ پرغاړه اباد کورونه هر وخت له ممکنه باراني سیلابونو اغېزمندای شي، دوی زیاتوي چې په سیمه کې د خوړ پر غاړو مېشت خامه کورونه زښته زیات شوي دي.
د چارواکو په خبره، چې له خرلاچۍ تر خپیانګې پورې شاوخوا ۷۲ کلومیټره د کورمې خوړ پر غاړه یو شمیر خلکو د کرکروندې لپاره ځمکې نېولې دي او کورونه یې ورباندې جوړ کړي دي.
د ایجنسۍ پلانینګ افسر مفتح الله مسود مشال ریډیو ته وویل چې کومو خلکو د خوړ پر غاړه کورونه او پټي جوړ کړي دي نو هغوی دې اوبو ته لاره پریږدي ځکه چې ممکنه سیلابونه دوی ته زیانمنولای شي:
''له خرلاچۍ تر خپیانګي پورې د بهېدونکي خوړ اوبه ډېرې تیزې راځي، دلته چې یو ګنټه باران وشي نو اوبه بیا ډیرې زیاتې وي. موږ خلکو ته خواست کوو چې د خوړ غاړې نه لرې شی ځکه چې سیلاب دوی ته زیان رسولای شي.''
یاده دې وي چې په سیمه کې پروسږ کال هم باراني سیلاونو د ځايي خلکو کورونه وران کړي ول او د کرکروندې ځمکې يې متاثره کړي وې.
ځايي مشر حاجی سلیم خان اورکزی وايي چې زیاتره سیمې داسې دي چې په کې تر دې دمه د ممکنه سیلاونو د مخنیوي لپاره په حکومتي کچه اوبو ته بند وهلو څه ډول منصوبه بندۍ نه دي شوې.
نوموړي د مشال ریډیو له لارې له حکومته غوښتنه وکړه چې د کورمې خوړ پر دواړو غاړو دې اوبو ته زر تر زره بندونه جوړ کړي ګنې یو ځل بیا به خلکو ته ستونزې جوړې شی:
''په دې موسم کې سیلاوونه راځي نو له دې نه دوی ته د لوې نقصان رسېدو خطره ده. زه دا وایم چې هغه علاقې چې په کمو کې سیلابونو د راتلو خطره زیاته وی نو پکار دې چې هلته کې بندونه دې جوړ کړې شی، که حکومت دغه ګام زر تر زره اوچت کړو نو ډیر خلک به د زیانونو نه بچ شی''
په دې اړه مفتح الله مسود وايي، چې له دوی سره دومره وسایل نیشته چې د کورمې خوړ په دواړو غاړو په هر ځای کې بندونه جوړ کړي.
نوموړي وویل، چې په ځینو سیمو کې ممکنه سیلاوونو نه د مخنیوي لپاره د پولیټیکل انتظامیې هلې ځلې روانې دي او زیاتوي، دوی غواړي چې دغه کارونه زر تر زره مکمل کړي چې خلک د ممکنه زیانونو بچ پاتې شي.
