د پاکستان او افغانستان د سرحدي ځواکونو ترمنځ دا جدي نښته د خوست په ځاځی میدان والسوالۍ کې په داسې وخت کې شوې چې دواړه حکومتونه د خپل منځي اړیکو ښه کولو هڅې کوي.
د پاکستان او افغانستان د سرحدي ځواکونو ترمنځ دا نښتې که څه هم لومړۍ نه دي خو په داسې وخت کې دي چې کابل ته د پاکستان وزیراعظم د سفر یوازې لس ورځې شوې دي.
وزیراعظم شاهد خاقان عباسي د افغان ولسمشر اشرف غني په بلنه د اپرېل پر شپږمه نېټه له یو لوړپوړي پلاوي سره کابل ته تللی وو.
افغان چارواکو دا سفر د دواړو هیوادونو د حکومتونو په کچه د خبرو اترو یو نوی او مهم پیل بللی دی او دواړو غاړو د اړیکو پر ښه کولو رضامندي ښودلې ده.
خو د تېرې اونۍ په پای کې د پاکستانیو او افغان ځواکونو ترمنځ شوو نښتو دا پوښتنه راپورته کړې چې ایا دا به د کابل او اسلام اباد په خپل منځي اړیکو کې د تاوتریخوالي سبب شي او که نه؟
په اسلام اباد کې د سیاسي چارو کارپوه او د پاکستاني پوځ پخوانی برېګېډیر سعد محمد خان وايي ، د ګاونډیو هیوادونو ترمنځ داسې پېښې وخت ناوخته رامنځ ته کېږي او دا د اړیکو په اړه د اندېښنې خبره نه ده.
ده وویل تر کومه حده چې د اړیکو د ښه کولو لپاره د روانو هڅو خبره ده نو په هغه کې دواړه غاړې لګیا دي نو دا پر پوله د نښتو مسله به پر هغه بهیر دومرې اغېز ونه کړي.
په کابل کې د سیمه ییزو چارو پوه ودیر ساپی وايي ، دی فکر کوي چې تر څو پاکستان له زړه ونه غواړي چې اړیکې ښې کړي نو تر هغه وخته به داسې غیریقیني صورتحال موجود وي.
نوموړي وویل ، د مسلو د هواري لپاره دا اړینه ده چې افغان حکومت باید دا ثابته کړې چې دوي پر حق او د پاکستان حکومت پر ناحقه دی.
د افغانستان او پاکستان اړیکې په تېر کال کې ډېر کړکېچنې وې خو په روان کال کې داسې ښکاري چې د ښه کېدو پر لور روانې دي چې بېلګې یې د دواړو غاړو د پلاو خپل منځي سفرونه او ورکړل شوي مثبت بیانونه دي.
