د یاد ګوند پلاوي غوښتنه کړې چې په پخوانیو قبایلي سیمو کې دې د صوبايي اسمبلۍ انتخابات هم د جولايي پر ۲۵مه ترسره شي.
د پاکستان الیکشن کمیشن د شنبې په ورځ په یو خبرپاڼه کې ویلي چې د متحده قبایل ګوند یو پلاوي د جمعې په ورځ په اسلام اباد کې د یادې ادارې له چارواکو سره تر فاټا انضمام وروسته د قومي اسمبلۍ له انتخاباتو سره سره د صوبې په اسمبلۍ کې هم د نمایندګۍ پر موضوع خپل دریځ شریک کړی دی.
د متحده قبایل ګوند له خوا د جون پر ۲۱مه په اسلام اباد کې د پریس کلب مخې ته احتجاجي مظاهره هم شوې وه.
د یاد ګوند مرستیال مشر حبیب نور اورکزي په وینا کې غوښتنه کړې وه چې په قبایلي سیمو کې دې بلدیاتي انتخابات هم ترسره شي.
د الیکشن کمېشن په خبرپاڼه کې راغلي چې یاده ادارې د متحده قبایل غړي خبر کړي دي چې د ملک له اساسي قانون سره سم به د ۲۰۱۸م تر انتخاباتو وروسته په یو کال کې دننه د پخوانیو قبایلي سیمو د ۱۶ صوبايي اسمبلۍ چوکیو لپاره د حلقه بندیو کار سر ته ورسوي.
د کمیشن چارواکیو د متحده قبایل ګوند پلاوي ته ډاډ ورکړی چې د صوبې د اسمبلۍ د انتخاباتو زر تر زره کولو لپاره به ټولې ممکنې هڅې کوي.
د پاکستان پارلیمان او د خیبر پښتونخوا اسمبلۍ د ۲۰۱۸م کال د مۍ په میاشت کې د قبایلي سیمو په خیبر پښتونخوا کې د ورګډولو په اړه قانوني مسوده منظوره کړه.
له دې قانوني مسودې سره سم پخوانیو قبایلي سیمو ته په صوبايي اسمبلۍ کې۲۱ چوکۍ ورکړل شوي دي چې ۱۶ پکې عامې ، ۴ د مېرمنو لپاره ځانګړې او یوه د مذهبي لږکیو لپاره ده.
حکومت ویلي وو چې پر دې چوکیو به انتخابات د ۲۰۱۹م کال په پیل کې ترسره کوي.
