هارون چخانسوري پر ټولنیزو رسنیو په خپاره کړي بیان کې ویلي چې که امریکا له افغانستانه لاړه شي نو د دوی پر امنیت به یې ډېر اغیز ونه شي.
د ده په وینا دا ځکه چې په تېرو څلورنیمو کلونو کې افغانانو د امنیت چارې پر خپله غاړه اخیستې دي.
دا له هغه وروسته ده چې امریکايي او نړیوالو رسنیو د ډېسېمبر ۲۰مې پر شپې ناوخته مهال وویل، ولسمشر ډونلډ ټرمپ له افغانستان څخه د "پام وړ" امریکايي ځواکونو د ایستلو په اړه غور کوي.
ځېنو رسنیو د امریکايي چارواکو په حواله ویلي دي چې په دې اړه ټرمپ وار له مخه فیصله هم کړې ده.
وال سټریټ ژورنال وايي، ځېنو لوړپوړو امریکايي چارواکو ورته د نوم نه ښودو په شرط ویلي دي چې ټرمپ "غواړي هغه ممکنې لارې چارې وڅېړي چې ورسره شخړې او جګړې پای ته ورسي."
د فرانسې خبري اژانس د یوه امریکايي چارواکي په حواله ویلي چې له افغانستانه د "پام وړ" امریکايي سرتېرو ایستلو په اړه فیصله شوې ده.
امریکا دا مهال په افغانستان کې شاوخوا ۱۴ زره سرتېري لري چې د ناټو غوڅ ملاتړ ماموریت په چوکاټ کې د افغان ملي ځواکونو د روزنې او هغوی ته د مشورو ورکولو دنده تر سره کوي.
امریکايي ټېلېوېژن سي اېن اېن او نیویارک ټایمز ورځپاڼې ویلي چې ټرمپ وار له مخه امر کړی دی چې له افغانستانه د خپلو شاوخوا نیمايي سرتېرو د ایستلو پلان جوړ کړي.
تر دې یوه ورځ مخکې، د ډېسېمبر پر ۱۹مه، امریکايي ولسمشر ډونلډ ټرمپ له شامه هم د خپلو سرتېرو ایستلو اعلان وکړ چې له کبله یې ورباندې خپلو متحدانو انتقاد وکړ او د ډېسېمبر پر ۲۰مه، رسنیو خبر ورکړ چې د دفاع وزیر جېمز میټس هم له هغه هېواده د سرتېرو ایستلو او د چین او روسیې په اړه د ټرمپ له تګلارو او نظر سره د اختلاف پر سر استعفا ورکړه.
دا خبرونه پر داسې مهال خپاره شوي چې روانه اوونۍ د افغانستان د سولې په اړه د امریکا د بهرنیو چارو وزارت ځانګړي استازي زلمي خلیلزاد په ابوظبۍ کې له طالبانو او د متحده عرب اماراتو، سعودي عرب او پاکستان له استازو سره خبرې وکړې.
هلته شنونکي نظر لري چې له افغانستانه د ځواکونو ایستلو پرېکړه په بیړه کې کېږي چې ښايي ناوړه اغېز ولري.
په امریکا کې د سیاسي چارو پوه ډاکتر محمد تقي وايي، دا ډول اقدام نه یوازې افغانستان بلکې "ان سیمه له بې ثباتۍ" سره مخامخولای شي.
دی وايي، له افغانستانه د ځواکونو ایستلو پرېکړه به "لویه تېروتنه" وي.
د ډاکتر تقي په اند، د دې ډول خبرونو خپرېدل د امریکا د دریځ کمزوري ښيي چې په نتیجه کې یې د افغان حکومت دریځ زیانمنېږي.
دی زیاتوي، دې حالت ته په کتو دې "افغان حکومت یو عکس العمل وښيي او یو مضبوط [دریځ دې غوره] کړي."
هلته د اسټرالیا په سېډني کې د اقتصادي او سولې چارو د انسټيټیوټ څېړونکی محب اقبال وايي، شاوخوا دوه میاشتې مخکې امریکايي حکومت د افغانستان په اړه د تګلارې د بدلون اشاره ورکړې وه نو د ځواکونو د ایستلو رپورټونه له طالبانو سره له خبرو سره تړاو نه لري.
دی وايي، البته که امریکا سرتېري باسي نو کېدای شي چې دا د افغانستان پر امنیت اغېز ولري.
د اقبال په خبره، که واشنګټن په افغانستان کې ۷۰۰۰ سرتېري هم پرېږدي نو هغوی کولای شي چې "تر یوې مودې" پورې د جګړې اوسنیو شرایطو ته دوام ورکړي او "وکولای شي چې هغه فشارونه چې پر طالبانو او نورو قواو موجود دي، هغه تر یوه حده ثابت وساتي."
کابل له امریکا څخه د خپرېدونکو دې رپورټونو په اړه لا څه نه دي ویلي او سپینې ماڼۍ یې هم رسمي تایید نه دی کړی.
په عین وخت کې د ولسمشر ټرمپ کلک ملاتړي سېنېټر لېنډزي ګراهام د دې خبرونو په غبرګون ویلي دي چې له افغانستانه د سرتېرو ایستل "خورا خطرناکه ستراتیژي" ده چې د ۲۰۰۱ز کال د سېپټېمبر ۱۱مې په څېر د بلې ترهګرې حملې لامل کېدای شي.
ده ویلي چې د شام په څېر له افغانستانه هم د سرتېرو ایستل باید په هغه هېواد کې "له وضعیت سره مشروط" وي.
سېنېټر ګراهام له شامه هم د امریکايي سرتېرو د ایستلو پر پرېکړې انتقاد کړی وو.
خو د ډېسېمبر پر ۲۰مه ولسمشر ټرمپ پر ټوېټر په بیان کې د خپلې پرېکړې دفاع وکړه او زیاته یې کړه چې "امریکا باید د منځني ختیځ پولیس" یا هلته د امنیت مسووله نشي.
