د پښتون ژغورنې غورځنګ د جنورۍ پر لومړۍ نېټه په جنوبي وزیرستان کې د ماینونو خلاف احتجاجي مظاهره کړې ده.
د خیبر پښتونخوا د ډېره اسماعیل خان په حق نواز پارک کې د احتجاج پر وخت له حکومته غوښتنه شوې چې په جنوبي وزیرستان کې په مځکه کې ښخ ماینونه دې پاک کړي.
د پښتون ژغورنې غورځنګ غړي اسحاق مسید مشال راډيو ته وویل چې د سیمې مځکه له بارودي موادو ډکه ده.
ده وویل چې تر اوسه لږ تر لږه ۲۵۰ ماشومان په مځکه کې د ښخو ماینونو چاودېدو معذوره کړي دي.
د احتجاج ګډونوالو وویل چې د یوازې په جنوبي وزیرستان کې تر اوسه د ماین چاودلو ۱۶۱ واقعات شوي دي.
دوی وویل له هم دې کبله له حکومتي او پوځي چارواکو غوښتنه کوي چې سیمه دې له ماینونو صفا کړي.
د جنوبی وزیرستان ایډیشنل ډپټي کمشنر فهیدالله مشال راډيو ته وویل چې په سیمه کې پوځي ټيمونو وار له مخه د ماینونو پر پاکولو کار شوروع کړی دی.
د مځکلاندې بمونو یا ماینونو پاکول د پښتون ژغورنې غورځنګ په بنیادي غوښتنو کې شامل وو.
پښتو ژغورنې وخت پر وخت په جنوبي ، شمالي وزیرستان او نورو قبایلي ضلعو کې د نورې بدامنۍ ترڅنګ هلته د ښخو ماینونو نه پاکولو پرضد اجتجاجونه کوي.
د پاکستان حکومت او پوځ تر دې وړاندې هم ویلي چې د ماینونو پاکولو لپاره یې ډلې جوړې کړې دي او هغوي پر دې کار کوي.
خو د حکومت او پوځ پر ادعاوو سربېره په بیا بیا په وزیرستان کې د ماین چاودنې کېږي چې له کبله یې زیاتره وخت کم عمره ماشومان د تل لپاره معذوره شي.
