د پېښور پر ارمي پبلک سکول په برید کې د وژل شویو زده کوونکو میندو او پلرونو له حکومته غوښتي دي چې له تحریک طالبان پاکستان سره دې مذاکرات نه کوي.
دوی د سېپټېمبر پر ۲۲مه په اسلام اباد کې د احتجاج پر مهال مشال راډیو ته وویل چې ولسمشر عارف علوي او د بهرنیو چارو وزیر شاه محمود قریشي دې د وسله والو د بښلو پرځای هغوی عدالتونو ته وړاندې کړي.
دوی دا مظاهره پر داسې مهال کړې چې روانه میاشت علوي او قریشي وویل، که د تحریک طالبان پاکستان وسله وال تسلیم شي، له جګړې لاس واخلي او د هېواد ایین ومني نو ورسره مذاکراتو ته تیار دي او بښلای یې شي.
د احتجاج یوې ګډونوالې شاهانې وویل، د حکومتي چارواکو څرګندونو خواشینې کړې ده.
مظاهره چیانو دا څرګندونې پر داسې وخت کړې دي چې د تېرې میاشت په نیمايي کې طالبان پر افغانستان واکمن شول.
په عین حال کې په قبایلي سیمو کې د ناامنیو پېښې هم زیاتې شوې دي. تحریک طالبان پاکستان د حکومتي چارواکو وړاندیز رد کړی دی.
د ۲۰۱۴ز کال په ډېسېمبر کې پر ارمي پبلک سکول د طالبانو په برید کې د زده کوونکو او ښوونکو په ګډون ۱۴۴ کسان وژل شوي ول.
