د بلوچستان پوهنتون کوټې څخه د دوو زده کوونکو د لادرکه کېدو پرضد د پوهنتون زده کوونکو بیا په احتجاج لاس پورې کړی او د زده کړو لړۍ درېدلې ده.
دوی غوښتنه لري چې حکومت دې د روانې میاشتې له لومړۍ نېټې څخه د پوهنتون له هاسټله د ورکو دوو زده کوونکيو سهیل بلوڅ او فصیح بلوڅ درک ولګوي او ذمه وارو ته دې سزا ورکړي.
د احتجاجونو له کبله په پوهنتون کې د زده کړو لړۍ ولاړه ده او کلنۍ ازموینې هم اغېزمنې شوي دي.
بلخوا د بلوچستان وزیراعلا میرعبدالقدوس بزنجو د بلوچستان پوهنتون د لادرکه زده کونکو په اړه د مالوماتو لپاره یوه درې کسیزه پارلېماني کمیټي هم ټاکلې ده.
د کمیټۍ یوه غړي نصرالله زیري د نومبر پر ۱۸ مشال راډیو ته وویل چې په دغه لړ کې یې د پوهنتون له زده کوونکو او انتظامیې سره ملاقاتونه کړي.
نوموړي زیاته کړې، مظاهره چیان ورسره رضا شوي چې له پوهنتونه بهر به احتجاج نه کوي.
د پوهنتون د زده کوونکو د لادرکه کېدو پرضد دا احتجاجونه د نومبر پر اتمه نېټه پیل شوي دي.
بلخوا د پوهنتون انتظامیې د نومبر له ۱۰مې نېټې راهیسې پوهنتون تر ناڅرګنده نېټې پورې تړلی دی.
له دې سره سم په بلوچستان اسمبلۍ کې د مخالفو ګوندونو غړیو ویلي چې د نومبر پر ۱۹مه به په دې اړه د اسمبلۍ په غونډه کې بحث کوي.
