د پاکستان پیپلز ګوند شریک مشر او پخواني ولسمشر اصف علي زرداري د حکومت او ناقانونه تحریک طالبان پاکستان ترمینځ د سولې خبرو ته په اشاره ویلي چې "ریاست هېڅ حق او واک نه لري" چې د "بېګناه خلکو وژونکي وبښي."
زرداري د خپل ګوند پر رسمي ووبپاڼه د ډېسېمبر پر ۱۶مه پر ارمي پبلک سکول په وسله وال برید کې د وژل شویو اووم تلین په مناسبت په بیان کې ویلي چې د "بېګناه شهیدانو وژونکي"، د هغه برید پلان جوړوونکي او پکې د اسانتیاوو برابروونکي عدالت ته حاضر نه شي او ورته "عبرتناکه سزا ور نه کړل شي" نو تر هغې پورې به "دولت او ملت د هغو بېګناه شهیدانو د وینو پوروړي وي."
پر ارمي پبلک سکول د ۲۰۱۴ز کال په حمله کې ۱۴۷ کسان وژل شوي ول چې زیاتره یې زده کوونکي او د ښوونځي کارکوونکي ول.
تحریک طالبان پاکستان د هغې حملې ذمه واري منلې وه.
خو د پاکستان حکومت وايي، د پېښور پر ارمي پبلک سکول په برید کې لاس لرونکي یې د پوځي عدالتونو له لارې سزا کړي دي او په عین حال کې په سپریم کورټ کې د حملې په اړه قضیه هم روانه ده.
هلته وزیراعظم عمران خان د پېښور پر ښوونځي د برید د اووم کال پوره کېدو په تړاو ویلي، اسلام اباد "په کامیابۍ ترهګري ماته کړې" او "هېڅکله به هم د برید ښکار شویو زده کوونکو او د هغوی کورنۍ نه مایوسوي."
عمران خان د ډېسېمبر پر ۱۶مه پر ټوېټر په بیان کې زیاته کړې چې د یوې وسیلې په توګه د تاوتریخوالي کاروونکي او تشدد په هېڅ صورت د منلو وړ نه دي.
زرداري د حکومت او طالبانو ترمینځ د سولې د هغو خبرو په اړه څرګندونې کړې دي چې مشال راډیو ورڅخه د نومبر په پیل کې پرده پورته کړه.
په خبرو کې د باور جوړونې لپاره حکومت او تحریک طالبان پاکستان د ډېسېمبر تر نهمې پورې یو میاشتنی اوربند هم وکړ چې طالبانو نور و نه غځاوه.
د پاکستان د اطلاعاتو او خپرونو چارو وزیر فواد چودري د نومبر پر اتمه د اوربند اعلان پر وخت ویلي ول چې خبرې د پاکستان د ایین او قانون په چوکاټ کې کېږي او پکې د هېواد د "خپلواکۍ، سلامتۍ"، امنیت او ټولنیزه او اقتصادي پیاوړتیا په پام کې نیول شوې.
د پېښور پر ارمي پبلک سکول د برید د اووم کال پوره کېدو په تړاو د وژل شویو زده کوونکو میندې او پلرونه د هغه ښار د ارکایېوز کتابتون په تالار کې ورغونډېږي چې پکې د پښتون ژغورنې غورځنګ په ګډون نورو فعالانو او مشرانو هم د ګډون اعلان کړی دی.
