د پاکستان د سپریم کورټ قاضي القضات (چیف جسټس) قاضي فایز عیسا ویلي دي چې د عدليې پر خپلواکۍ ګوزارونه نه شي زغملای.
قاضي فایز عیسا د اپرېل پر درېیمه د اسلام اباد های کورټ د شپږو ججانو پر لیک له خپل لوري د اقدام یا د سوموټو نوټس اورېدنې پر مهال وویل چې کېدای شي په راتلونکې کې د قضیې اورېدنه د ټولو قاضیانو جرګګۍ (فل کورټ) وکړي.
هغه وویل چې د سترې محکمې قاضیان به په دې اړه بحث وکړي او بیا یې اورېدنه د اپرېل تر ۲۹ مې پورې وځندوله.
سپریم کورټ د اپرېل پر لومړۍ په عدالتي چارو کې د استخباراتي ادارو د لاسوهنې د تورونو په اړه له خپل لوري اقدام وکړ.
دا تر هغې وروسته ده چې د اسلام اباد های کورټ شپږ قاضیانو سپریم کورټه لیک واستاوه چې پکې یې دعوه کړې ده چې استخباراتي ادارې یې په کار کې مداخله کوي.
حکومت د هغو تورونو د پلټنې لپاره عدالتي کمېشن هم اعلان کړی وو خو وروسته د کمېشن مشرۍ لپاره نومول شوي مشر او پخواني قاضي تصدق حسین جیلاني انکار وکړ.
د پاکستان استخباراتي ادارو پر دې اړه څه نه دي ويلي خو مخکې يې په وار وار ويلي دي چې د ملک په سياسي او عدالتي چارو کې لاسوهنه نه کوي.
په همدې حال کې د لاهور د پولیسو یو لوړپوړي چارواکي علي ناصر رضوي خبریالانو ته ویلي دي چې د اپرېل پر درېیمه د لاهور های کورټ څلورو قاضیانو ته مشکوک خطونه لېږدول شوي دي.
هغه په دې اړه نور جزییات ور نه کړل خو و یې ویل چې تر پلټنو وروسته به له رسنیو سره نور معلومات شریک کړي.
دا تر هغې وروسته ده چې د اسلام اباد پوليسو د اپرېل پر دویمه پر خپله رسمي اېکس پاڼه وليکل چې د اسلام اباد های کورټ ججانو ته یې له نامعلومو کسانو له لوري لوري د استول شویو خطونو مقدمه د پولیسو د ترهګرۍ مخنیوي څانګې (سي ټي ډي) په تاڼه کې دایره کړې ده.
د پاکستان رسنۍ د پولیسو چارواکو په حواله وايي چې په هغو خطونو کې قاضیان ګواښل شوي دي. خو چارواکو په دې اړه نور معلومات نه دي ورکړي.
