د پاکستان تر واک لاندې کشمیر د راولا کوټ ښار له زندانه ۱۸ بندیان تښتېدلي دي.
چارواکي وايي، پېښه د جون پر ۳۰مه هغه مهال وشوه چې په زندانیانو کې یو له ځان سره تمانچه ایښې وه او د هغې په وسیله یې د زندان ساتونکی قابو کړی او کلي (کونجي) یې ترې اخیستې ده.
پولیسو په دې اړه څه نه دي ویلي چې تمانچه هغه زنداني ته څنګه او چا رسولې وه.
د ځايي پولیسو مشر ریاض مغل د جولای پر لومړۍ نېټه اسوشیېټېډ پریس ته وویل چې د راولاکوټ له زندانه د تښتېدلو پر مهال یو بندي په ډزو وژل شوی دی.
هغه وویل چې په تښتېدلو کې شپږ کسان د مرګ او درې تنه د ټول عمري قید په سزا محکوم شوي ول.
مغل وايي په پاکستان کې د زندانونو ماتېدلو پېښې ډېرې کمې کېږي. د دې پېښې په ترڅ کې د زندان مشر او ځینې نور چارواکي له دندو لرې کړل شوي دي.
راولا کوټ ښار له مرکزي ښار مظفراباد څخه ۱۱۰ کیلومیټره جنوب ته پروت دی.
