د اسټرالیا د کرکټ ملي لوبډلې د نومبر پر ۱۶مه په دویمه ۲۰ اووریزه لوبه کې هم د پاکستان لوبډلې ته ماته ورکړه.
د اسټرالیا لوبډلې له دې سره د درې شل اوریزو سیالیو په لومړيو دوو لوبو کې بریا ترلاسه کړه او ورسره یې دا لوبلړۍ هم پخپل نوم کړه.
په دویمه لوبه کې د اسټرالیا لوبډلې پچه وګټله او لومړی یې په خپله د بېټنګ کولو پرېکړه وکړه. هغوی په ۲۰ اورونو کې د ۹ لوبغاړو په سر ۱۴۷ منډې وکړې.
په ځواب کې د پاکستان ټول لوبغاړي په ۱۹م اوور کې د ۱۳۴ له جوړولو وروسته اوټ شول. د اسټرالیا لوبډلې دا لوبه په ۱۳ منډو وګټله.
تر دې وړاندې د نومبر پر ۱۴مه ترسره شوې لومړۍ لوبه هم اسټرالیا ګټلې وه. د دې لوبډلو ترمنځ به وروستۍ ۲۰ اووریزه لوبه د نومبر پر ۱۸مه ترسره کېږي.
