د خیبر پښتونخوا په کرک کې په یوه ټرافیکي پېښه کې ۱۰ کسان مړه شوي او نهه ژوبل دي.
د کرک د ژغورنې او مرستندويه چارو ادارې (رېسکيو ۱۱۲۲) وياند محمد اصف مشال راډيو ته وويل چې د اپرېل پر ۱۵مه په لکي غونډي سیمه کې پر اباسين لويه لاره (انډس هايوې) د مساپرو وړونکي ګاډي او ټرالر تر مینځ ټکر وشو چې ۱۰ کسان پر هغه ځای ووژل شول.
نوموړي زياته کړه، پېښه هغه وخت وشوه کله چې ټرالر د مساپرو پر ګاډي ورغلی.
د هغه په خبره، تر پېښې وروسته ځينې مساپر په ګاډي کې بند پاته ول چې د ژغورنې ادارې کارکوونکو راوایستل او روغتون ته يې ورسول.
د ژغورنې ادارې ویاند وايي چې وژل شویو کې زیاتره د شمالي وزیرستان ول.
بلخوا په ژوبلو کې د پينځو کسانو حالت د اندېښنې وړ وو چې وروسته پېښور ته ولېږدول شول.
تر دې وړاندې، د اپرېل پر پينځمه د خیبر پښتونخوا په شانګله کې په يوه ټرافيکي پېښه کې څلور کسان وژل شوي او يو ژوبل شوی وو.
د مارچ پر ۲۷مه هم په شانګله په يوه ټرافيکي پېښه کې پينځه کسان وژل شوي او درې ژوبل شوي ول.
په پاکستان کې ټرافیکي پېښې زياتره وخت د قوانینو نه عملي کېدو، د سړکونو د خرابوالي، د ډرېورانو د بې احتیاطۍ او د هغوی د سمې روزنې نه کېدو او پر ټاکلي وخت د ګاډو د مرمت او معاینې نه کولو له وجې کېږي.
د دې ترڅنګ په ځینو وړو ښارونو او کلیوالو سیمو کې د ټرافیک کنټرول نظام کمزوری دی چې د حادثو مخه نیول ګرانوي. داراز، په ګاډو کې له اندازې زیات بار لېږدول یې هم کله نا کله توازن خرابوي او د پېښو ښکار کېږي.
د همدې له کبله په خیبر پښتونخوا او د پاکستان په نورو برخو کې وخت په وخت ټرافیکي پېښې خلکو ته ځاني او مالي تاوانونه اړوي.
د جنورۍ پر ۱۱مه د خیبر پښتونخوا په کرک کې د ګاډو ټکر په پېښه کې اته تنه ووژل او ۱۳ ژوبل شول.
تر دې مخکې د ۲۰۲۴ز کال د ډېسېمبر په پای کې په سیند او پنجاب کې په دوه جلا جلا پېښو کې ۱۸ کسان وژل شوي ول.
