د افغانستان پخواني ولسمشر حامد کرزي ویلي د پکتيکا ولایت پر برمل ولسوالۍ د "پاکستان له لوري د توغندیو ورول" د افغانستان پر خاوره "تېری" دی.
پاکستان په دې اړه لا څه نه دي ویلي او په کابل کې د طالبانو د حکومت چارواکو یې هم په اړه رسماً څه نه دي ویلي، خو یوې باخبره سرچینې د جولای پر ۲۷مه مشال راډیو ته پر برمل د پاکستان له خوا د توغندیو برید تایید کړی دی.
هغې سرچینې د موضوع حساسیت له کبله د نوم او پېژندګلوۍ نه په ډاګه کولو په شرط وویل چې توغندي د جولای پر ۲۵مه ویشتل شوي او موخه یې د پاکستانیو طالبانو پټنځایونه په نښه کول ول.
سرچینې په هغه برید کې د مرګژوبلې په اړه څه و نه ویل.
تحریک طالبان پاکستان (ټي ټي پي) هم لا د توغندیو برید په اړه څه نه دي ویلي.
پخواني ولسمشر حامد کرزي د جولای پر ۲۷مه پر اېکس، چې پخوانی نوم یې ټوېټر وو، په بیان د توغندیو ویشتل "په کلکه غندلي" او دا یې د "نړیوالو اصولو سرغړونه" بللې ده.
دا په داسې حال کې ده چې د پاکستان پوځي او حکومتي چارواکي له یوې مودې راهیسې تور پورې کوي چې د ټي ټي پي وسلوال په افغانستان کې پټنځایونه لري.
د پاکستان پوځ او حکومت د جولای پر ۱۲مه د بلوچستان په پښتون مېشته سیمه ژوب کې پر چاوڼۍ تر وسلوال برید وروسته په افغانستان کې د پاکستانیو طالبانو د پټنځایونو په اړه سخته اندېښنه څرګنده کړه.
په ژوب کې پر چاوڼۍ د وسلوالو په برید او وروسته په نښته کې نهه سرتېري وژل شوي ول.
د پاکستان پوځ هغه مهال ویلي ول چې په نښته کې یې پینځه مشکوک وسلوال وژلي دي. د پوځ په وینا، په چاوڼۍ کې تر یوشمېر ساعتونو نښته او بیا تصفیوي عملیات روان ول.
د تحریک جهاد پاکستان په نوم یوې کمې پېژندل شوې وسلوالې ډلې د حملې ذمه واري منلې وه.
تر هغې وروسته، د پاکستان د دفاع وزیر خواجه اصف د جولای پر ۱۵مه تور پورې کړ چې افغانستان د "یو ګاونډي هېواد په توګه خپل کردار نه ترسره کوي" او د طالبانو حکومت هلته "ترهګرو ته پټنځایونه" ورکړي دي.
تر دې یوه ورځ مخکې د پاکستان پوځ په بیان کې ویلي ول چې د طالبانو له حکومته تمه لري چې د افغانستان خاوره به د "هېڅ هېواد پرضد د ترهګرۍ لپاره استعمالېدو ته پرې نه ږدي" او د ۲۰۲۰ز کال د دوحې موافقې ژمنې پوره کړي.
د طالبانو حکومت په افغانستان کې وسلوالو ته د پټنځایونو ورکولو په اړه د اصف او پوځ تورونه رد کړل. د طالبانو ویاند ذبیح الله مجاهد د جولای پر ۱۵مه مشال راډیو ته په استولي غږیز بیان کې ویلي ول چې "طالبان د جنګونو له زیانونو خبر دي او نه غواړي چې بل چاته دغه زیانونه ورسوي."
په همدې حال کې د طالبانو د حکومت د بهرنیو چارو سرپرست وزیر امیر خان متقي ویلي دي چې حکومت یې د افغانستان خاوره د نورو هېوادونو پرضد کارېدو ته نه پرېږدي.
طالبانو په دوحه کې د ۲۰۲۰ز کال د فبرورۍ په تړون کې ژمنه کړې وه چې د القاعدې په ګډون به هېڅ ډلې ته اجازه نه ورکوي چې د افغانستان خاوره د نورو هېوادونو پرضد وکاروي.
