د پاکستان امنيتي ځواکونو د شمالي وزيرستان په رزمک او میرلي کې د دوو مشکوکو وسلوالو د وژنې او د يو د نيولو ادعا کړې ده.
په میرامشا کې د پوځ یو افسر د نوم نه خپرولو په شرط مشال راډیو ته وویل چې د اپرېل پر اتمه يې په رزمک کې د پټو معلوماتو پر بنیاد د وسلوالو پرضد کاروايي کړې ده.
هغه ادعا وکړه چې په عملیاتو کې یې د ناقانونه تحريک طالبان پاکستان ډلې دوه وسلوال وژلي دي.
طالبانو لا تر اوسه په دې اړه څه نه دې ويلي او خپلواکو سرچينو هم لا د دې دعوې تصديق نه دی کړی.
خو د هغې پوځي سرچينې په خبره د اپرېل پر اتمه یې په میرلي کې د عملیاتو پرمهال یو بل مشکوک وسلوال له چوونکو موادو سره نیولی دی.
په وروستيو کې په جنوبي وزیرستان، شمالي وزيرستان، بنو او لکي مروت کې وسلوال بريدونه زیات شوي چې پکې د ځينو ذمه واري تحریک طالبان پاکستان منلې ده.
د سیمې خلکو د زیاتېدونکې ناامنيو او پوځي عملياتو پر ضد مظاهرې هم کړې دي. دوی غوښتنه لري چې که د پاکستان ریاست ترهګري ختمول غواړي نو په وسلوالو کې بايد توپیر و نه شي.
د پخواني وزیراعظم عمران خان په واکمنۍ کې د ۲۰۲۱ز کال له وروستیو د پوځ د هغه وخت د مشرتابه په سلا له تحریک طالبان پاکستان سره خبرې اترې پیل شوې وې. هغه خبرې اترې د افغان طالبانو په منځګړتوب کېدې چې په یوشمېر پړاوونو کې یې سیاسي او قبایلي مشرانو هم برخه اخیستې وه.
د هغو خبرو اترو په نتیجه کې د پاکستان او تحریک طالبان پاکستان ترمینځ اوربند هم شوی وو چې بیا هغې وسلوالې ډلې د ۲۰۲۲ز کال د نومبر پر ۲۷مه ختم کړ. تحریک طالبان پاکستان هغه وخت ویلي ول چې ډزبندي یې ځکه ماته کړې ده چې د دوی په وینا، پاکستانیو ځواکونو یې پرضد عملیاتو ته دوام ورکړی دی.
خو د وزیراعظم شهباز شریف په مشرۍ کې د اپرېل پر اوومه د ملي امنیت کمېټۍ په غونډه کې د تحریک انصاف پر هغه تګلاره نیوکې وشوې.
د هغې غونډې په خبرپاڼه کې ویل شوي چې د هم هغې تګلارې له کبله د تحریک طالبان پاکستان وسلوالو له زندانونو خوشې شوي ول.
د پاکستان پوځ هم وايي، وسلوال بیامنظمېدو ته نه پرېږدي او د ترهګرۍ او سختدریځۍ پرضد مبارزې ته دوام ورکوي.
د پوځ مشر جنرال سید عاصم منیر د مارچ پر ۱۴مه جنوبي وزیرستان ته د سفر پر مهال وویل چې "په بشپړ ډول د ترهګرۍ تر ختمېدو پورې جنګ" ته دوام ورکوي.
منیر زیاته کړه چې د "ترهګرۍ پرضد په جګړه کې" د بېلابېلو دولتي یا ریاستي ادارو ترمینځ "رابطې او همکاري" اړینه ده.
