په شمالي وزيرستان کې د اتمانزيو جرګې مشرانو له امنيتي ځواکونو سره پر هر ډول ناستو او جرګو کولو بنديز لګولی دی.
د هغې جرګې ویاند مولانا بیت الله د جنورۍ پر اتمه مشال راډيو ته وویل چې تر دې وړاندې يې له پوځ سره شویو جرګو کومه مثبت نتیجه نه ده ورکړې. "د امن لپاره [حکومتي] اقدامات زموږ خلاف دي. موږ له پوځ سره پر هر ډول جرګو بنديز لګولی دی او له دوی سره جرګې نه کوو ځکه د دې جرګو هېڅ مثبت نتیجه نه شته."
نوموړي دعوه وکړه چې د ناامنۍ او ترهګرۍ ختمولو پر ځای د پوځ په عملياتو کې عام ولس اغېزمنېږي او د هغوی پر کورونو د ډزو او هاوان (مارټر) مرميو لګېدو په نتيجه کې مرګژوبله اوړي.
حکومت او پوځ د اتمانزيو جرګې د تازه پرېکړې په اړه لا څه نه دي ويلي، البته وړاندې يې په وار وار ويلي دي چې د وسلوالو پرضد يې عملیات ګړندي کړي او دا چې هڅه کوي چې ولسي وګړو ته زیان پکې و نه رسېږي.
د اتمانزيو جرګې اعلان کړی دی چې د جنورۍ پر ۱۱مه به د بنو د جانيخېلو او د لکي مروتو د جرګو له مشرانو سره ناسته کوي او د روانې ناامنۍ پرضد به ګډه پرېکړه کوي.
دا په داسې حال کې ده چې د جنورۍ پر اوومه د شمالي وزیرستان په میرلي کې د هاوان توغول شوې مرمۍ په هرمز سیمه کې پر یو کور ولګېدله چې پکې دوه ښځې او یو ماشوم ژوبل شول. د میرلي اوسېدونکو دعوه کړې چې د هاوان مرمۍ د میرلي له پوځي کیمپه توغول شوې وه.
د هغې سیمې اوسېدونکي وايي چې د امنیتي ځواکونو او وسلوالو ترمینځ د نښتو پر مهال زياتره وخت ولسي وګړو ته زیان اوړي.
د اتمانزیو جرګې تر دې مخکې هم په سیمه کې د ناامنۍ خلاف جرګې، ولسي غونډې او احتجاجونه کړي دي او د سیمې د امنیت پر ځای کول، د هدفي وژنو مخنيوی، د عملياتو پر مهال د ولسي وګړو نه ځورول او نه ګرفتارول، د ۲۰۱۴ز کال د پوځي عملیاتو او ناامنیو پر مهال د ميرامشا د ړنګ شوي بازار دوکاندارانو ته د تاوان ورکول او د سيمې په وسايلو کې د خپلې ونډې غوښتنې کړې دي.
هغې جرګې د ۲۰۲۴ز کال د اکتوبر له دويمې څخه احتجاجاً د شمالي وزيرستان د ټولو سرکاري او غیرسرکاري دفترونو د تړلو اعلان هم کړی وو.
جرګې هغه وخت هم دعوه کړې وه چې حکومت او پوځ د امنیت په ټینګښت او د هغوی د غوښتنو په پوره کولو کې پاتې راغلي دي.
هغوی د احتجاج په لومړي سر کې د بنو او غلام خان تر مينځ لويه لاره هم د تګ راتګ پرمخ تړلې وه.
تر هغه وړاندې د اتمانزيو جرګې د اګست پر ۱۵مه په میرلي کې د امنیت د ټینګښت او نورو غوښتنو په موخه د "امن پاڅون" په نامه لاریون کړی وو او هلته غځېدلی د ګیس پایپلاین یې د احتجاج په توګه پرې کړی وو.
خو د پاکستان حکومت او پوځ وايي چې د ترهګرۍ ختمولو ته ژمن دي او د دې لپاره یې د وسلوالو پرضد هدفي عملياتو ته دوام ورکړی دی.
