د بلوچستان د زیارت ضلعې په مانګي سيمه کې د ځمکلاندې بم په چاودنه کې دوه پوځيان وژل شوي دي.
په کوټه کې يو لوړپوړي امنيتي چارواکي د نوم نه خپرولو په شرط مشال راډيو ته وويل چې د نومبر پر ۱۴مه سرتېرو په مانګي سيمه کې ګزمه کوله چې ناڅاپه د ماين چاودنه ورباندې وشوه.
د هغه په وينا، په پېښه کې د سرحدي ځواکونو يو مېجر او يو حوالدار وژل شوی او درې سرتېري ژوبل شوي دي.
بلخوا د نومبر پر ۱۳مه شپې مهال له زيارت څخه د تښتول شويو دوو کسانو مړي د نومبر پر ۱۴مه سهار د هغې سيمې په يوه غره کې موندل شوي دي.
چارواکي زياتوي چې وژل شوي کسان د پنجاب صوبې دي.
د دواړو پېښو ذمه واري لا چا نه ده منلې خو تر دې وړاندې په تېرو وختونو کې د دا ډول زياترو پېښو ذمه واري بلوڅ بېلتونپالو وسلوالو ډلو منلې ده.
په بلوچستان کې په وروستيو کې د ناامنۍ پېښې زياتې شوې دي. د نومبر پر نهمه د کوټې د اورګاډو په تمځای کې په ځانمرګي برید کې لږ تر لږه ۲۶ کسان ووژل او له ۶۰ زيات ژوبل شول. چارواکي وايي چې د حملې له ښکار شویو څخه یې اکثر پوځیان ول.
د هغې حملې ذمه واري بلوڅ بېلتونپالې وسلوالې ډلې بلوچ لېبرېشن ارمي (بي اېل اې) منلې وه او ادعا یې کړې وه چې په هغه ځانمرګي برید کې یې د پاکستاني پوځ هغه سرتېري په نخښه کړي ول چې تر پوځي روزنې وروسته په جعفر اېکسپرېس نومې اورګاډي کې له کوټې ستنېدل.
