په بلوچستان کې د ټولنې ښوونځیو یا کمیونټي سکولونو استادانو د خپلو دندو د دایمي کولو لپاره احتجاج ته دوام ورکړی دی.
دوی له تېرو ۱۰ ورځو راهیسې د کوټې د خبریالانو مرکز مخې ته پرلت وهلی دی. د کمیونټي سکولونو د استادانو اتحادیې سېکرټر ارباب خان د جون پر ۱۵مه مشال راډیو ته وویل، ۱۵ کاله مخکې ورسره حکومت د نوکریو دایمي کولو ژمنه کړې وه چې تر اوسه نه ده پوره شوې.
پرلتوال همداراز غواړي چې د پاکستان په ایین کې له ۱۸م بدلون سره سم دې، د ښوونځیو واک د وفاق پر ځای صوبايي حکومت ته وسپارل شي. څه د پاسه یوه لسیزه مخکې په پاکستان کې پارلېمان په ایین کې بدلون وکړ چې ورسره سم، د تعلیم په ګډون یوشمېر چارې له وفاقي حکومته صوبايي هغو ته وسپارل شوې.
د بلوچستان د تعلیمي چارو صوبايي وزیر میر نصیب الله مری وايي، د ښوونکو ستونزې په هغه صورت کې هوارېدای شي چې په اړه یې په اسمبلۍ کې قانون جوړ شي.
نوموړي د جون پر ۱۵مه مشال راډیو ته وویل د هغوی د ګورنر په فرمان یا امر هم هوارېدای شي. د پاکستان په صوبو کې ګورنر د وفاق استازی وي چې زیات اجراییه واک نه لري خو د وفاقي چارو په اړه فیصلې کولای شي.
کمیونټي سکولونه د صوبې په لیرې پرتو هغو سیمو کې ماشومانو ته تعلیم ورکوي چې پکې ښوونځي نه شته. هغه ښوونځي د ټولنې خلک چلوي او حکومت ورته تنخا ورکوي. په دې توګه کمیونټي سکولونه یو ډول نارسمي تعلیمي ادارې دي.
هغه ښوونځي په ۲۰۰۷ز کال کې د نړیوال بانک په مالي ملاتړ جوړ شول چې لا هم په خیبر پښتونخوا او بلوچستان کې فعال دي.
په بلوچستان کې د هغو ښوونځیو د اتحادیې یوه غړي او استاد اکبر خان مشال راډیو ته وویل، په هغه صوبه کې د کمیونټي سکولونو د ښوونکو شمېر ۹۱۵ ته رسېدلی چې تر ۶۰،۰۰۰ پورې ماشومانو ته ابتدايي او ثانوي تعلیم ورکوي.
