د پښتون ژغورنې غورځنګ مخکښ علي وزیر د ضمانت په اړه د عدالت له خوا د پرېکړې اورول د جنورۍ تر ۳۱مې ځنډول شوې ده.
په کراچۍ کې د ترهګرۍ ضد عدالت د ۲۰۲۱ کال د ډېسېمبر پر ۲۸مه، د علي وزیر د ضمانت په خواست پرېکړه د جنورۍ تر ۱۵مې نېټې پورې ځنډولې وه. خو د علي وزیر وکیل قادرخان ایډوکیټ د جنورۍ پر ۱۵مه، مشال راډیو ته وویل چې د پرېکړې اورول د جج د ناروغۍ له کبله ځنډېدلي دي.
یاده دې وي چې علي وزیر د ۲۰۲۰ز کال د دسمبر پر ۱۶مه پوليسو په پېښور کې نيولی او وروسته یې سند صوبې ته لېږلی و. پولیسو پر هغه تور پورې کړی چې پروسږ کال د دسمبر پر ۶مه د کراچۍ په سهراب ګوټ جلسه کې یې د تقریر په وخت، د رياست او ریاستي ادارو پرضد ويناکړې وه. خو پښتون ژغورنې غورځنګ د پوليسو دغه تورونه بيا بيا رد کړي او وايي چې دوی له قانونې او پرامنه لارې د پښتنو حقونه غواړي.
دا هم وګورئ: عدالت د علي وزیر د ضمانت پرېکړه پر ۱۵مه جنوري اورويعلي وزیر دا تورونه ردوي او د پاکستان سپریم کورټ په دې مقدمه کې د هغه ضمانت منظور کړی دی.
دا په داسې حال کې ده چې د جنورۍ پر ۱۴مه، په اسلام اباد کې د پښتون ژغورنې غورځنګ په بلنه د علي وزیر په ګډون د یاد غورځنګ د یوشمېر نورو بندي غړو د راخوشې کولو لپاره احتجاجي مظاهره وشوه.
د غورځنګ مشر منظور پښتين په خپله وینا کې وويل چې علي وزیر هېڅ ناقانونه کار نه دی کړی او بايد زر تر زره خوشې کړل شي.
ستاسې سېسټم د HTML5 په چلولو کې ستونزه لري.
په اسلام اباد کې د علي وزير د ګرفتارۍ پرضد مظاهره وشوه
منظور پښتین وویل، علي وزیر د جنوبي وزیرستان د واڼه له یوې داسې سیمې دی چې هلته تر ټولو مخکې یې د بهرنیو ترهګرو پروړاندې لښکر جوړ کړي ول. او د دې په نتیجه کې د علي وزیر پر کورنۍ پر له پسې بریدونه وشول چې پکې د ده د کورنۍ ۱۸ تنه ووژل شول.
د نوموړي په وینا، ریاست په ظاهره د ترهګرۍ ضد جګړې دعوې کوي خو احسان الله احسان یې په بنګلو کې کښېنولی او علي وزیر یې جېل ته اچولی دی. ده وویل چې نن پر علي وزیر د ترهګرۍ دفعات لګول شوي دي. د ترهګرۍ په دفعاتو کې راو انوار او احسان الله احسان تر اوسه و نه نیول شول. بلکې هغه خلک یې نیولي دي چې د ترهګرۍ خلاف دي.
یاده دې وي چې احسان الله احسان په تېر کې د تحریک طالبان پاکستان ویاند و او راو انوار په کراچۍ کې د یوه پښتانه ځوان نقیب الله مسید په ګډون د ګڼو نورو کسانو په جعلي پولیس حملو په وژنو عدالت تورن ګرځولی و.