د امریکا ولسمشر جو بایډن وایي، هغه پر دې قانع دی چې د روسیې ولسمشر ولادیمیر پوتین پرېکړه کړې ده چې راتلونکې اوونۍ پر اوکراين بريد وکړي خو وايي، لا هم ډیپلوماتیکي حل لارې ته هیله من دی.
بایډن د فبرورۍ پر ۱۸مه په سپینه ماڼۍ کې خبرې غونډې ته وویل، " له همدې شیبې زه قانع يم چې ولسمشر پوتین پر اوکراين د بريد پرېکړه کړې ده."
د امریکا ولسمشر دا خبرې له خپلو اروپایي سيالانو سره تر ۴۵ دقیقو ټیلفوني کنفرانس وروسته وکړې. نوموړي وویل، د امریکا د بهرنیو چارو وزیر اینتني بلینکین به د روسیې له بهرنیو چارو وزیر سرګي لاوروف سره د فبرورۍ پر ۲۴مه په اروپا کې وګوري او دا د جګړو د مخنیوي د هڅو برخه ده.
بایډن دا هم وویل، که چیرته روس تر دې نیټې مخکې پر اوکراین برید وکړ نو دا به په د ې مانا وي چې ماسکو د ډیپلوماسۍ لار تړي او که چیرته دوی د جګړې لاره خپله کړه، ستر قیمت به یې بیا پرې کړي.
بل پلو، روسیه وایي چې دوی پر اوکراین د بريد پلان نه لري او امریکا هسې احساساتي او بېځایه اوازې خپروي.
دا هم وګورئ: غربي هېوادونه: روسیه دې د ترینګلتیا کمولو لپاره کوټلي ګامونه واخليد امریکا ولسمشر په داسې وخت کې پر اوکراین د روسیې لخوا برید ته ژوره اندیښنه ښکاره کړې ده چې د اوکراین په ختیځ کې، د کییف پرضد، د روس پلوه بېلتون غوښتونکو فعالیتونه زیات شوي دي.
اوکراین ويلي، د روسیې په ملاتړ د دغه هېواد په ختیځ کې د بېلتون غوښتونکو له لوري له اوربنده ناڅاپي په بېساري ډول سرغړونې زیاتې شوي دي.
د اوکراین پوځ د فبرورۍ پر ۱۸مه، په یوه راپور کې څرګنده کړه چې په تېرو ۲۴ ساعتونو کې له اوربنده ۶۰ ځله سرغړونې شوي دي چې دا بېسارې دي. د راپور له مخې پر دې مهال د اوکراین یو سرتیری ټپي شوی هم دی.
د اوکراین ولسمشر ولودومیر زېلېنسکي د حکومتي ځواکونو او بېلتون غوښتونکو ترمنځ پر لومړۍ کرښه د ناڅاپي ډزو زیاتېدل یوه پارونکې هڅه وبلله چې له امله یې په یوه وړوکتون کې دوه ماشومان ټپیان شول.
اوکراین د خپل هېواد په ختیځ کې د ۲۰۱۴ز کال له اپریل مياشتې را په دې خوا له بېلتون غوښتونکو سره په جګړه دی.
په دې جګړه کې تر اوسه لږ تر لږه ۱۳،۲۰۰ کسان وژل شوي دي.