د افغانستان له خوست څخه بنو ته ستانه شویو د شمالي وزیرستان کډوالو د دې لپاره احتجاج کړی چې حکومت یې زر تر زره خپلو سیمو ته ستانه کړي.
دا د شمالي وزیرستان هغه کډوال دي چې په تېرو څو میاشتو کې له افغانستانه ستانه شوي او د بنو بکاخېل کډوالو کېمپ ته نژدې یې په یو دښته یا لګاډه کې اړولي دي.
دې کډوالو د جون پر درېیمه نېټه په بنو کې د لاریون او احتجاج پر مهال وویل چې د دوی شمېر له اتو تر لسو زرو کورنیو دی او د بکاخېلو کېمپ ته هم نه پرېښودل کېږي.
دوی وايي نه اوبه لري، نه بجلي لري او نه هم د ژوند نورې اسانتیاوې لري نو ځکه غوښتنه کوي چې خپلو سیمو ته ستانه کړل شي.
دا هم وګورئ: شمالي وزیرستان کې پرله پسې هدفي بریدونو خلک اندېښمن کړي دي
د احتجاج یو ګډونوال صادق منان مشال راډیو ته وویل چې دوی له اته کلنې بې کورۍ وروسته هم خپلو سیمو ته ستانه نه کړل شو.
ده وویل، " له افغانستانه یې راستانه کړو او دلته مو په سخته ګرمي کې ماشومان او ښځې له ډېرو مشکلاتو سره مخامخ دي."
ده وویل چې د پاکستان د پوځي عملیاتو له کبله یې کورونه او کاروبارونه تباه شوي او ماشومان یې بې زده کړو پاتې شوي دي.
د احتجاج یو بل ګډونوال عبدالعزیز وویل چې د څښلو اوبه لا نه لري او په دې سخته ګرمي کې ورته په خېمه کې د ژوند تېرول ډېر ګران شوي دي.
د شمالي وزیرستان مرستیال کمشنر شاهد علي خان له افغانستانه د راستانه شویو دې کډوالو د ستونزو په اړه مشال راډیو ته وویل چې دا کډوال د دته خېلو دي او هغه سیمه لا هم د ده په وینا له وسله والو په پوره توګه پاکه شوې نه ده.
ده وویل چې د دې سیمو د پاکولو لړۍ او د کډوالو ور ستنولو په اړه خبرې روانې دي.
دا هم وګورئ: په شمالي وزیرستان کې بریدونه څوک کوي؟
په میرامشاه کې مو له پوځي چارواکو هم وپوښتل چې ولې دا کډوال د بکاخېلو کیمپ پر ځای په یوه لګاډه کې میشت دي نو هغوی له څه ویلو ډډه وکړه.
خو په خیبر پښتونخوا کې د قدرتي افتونو بر وخت د انتظام ادارې ویاند احسان داوړ بیا وویل چې له دې کډوالو سره د موبایل سیم له لارې میاشتېنۍ مرستې روانې دي.
ده وویل چې یو ځل یې نوم لیکنه شوې او د لا نورو مرستو ورکولو ته یې هم پام دی.
دا د شمالي وزیرستان هغه کډوال دي چې د وسله والو پرضد د پاکستاني پوځ د ضرب عضب په نامه عملیاتو له کبله بې کوره شوي وو.
د ۲۰۱۲م کال د جون پر ۱۵مه پیل شوو دې عملیاتو څو کاله دوام وکړ او تر یو میلیون زیات خلک یې بې کوره کړل چې لویه برخه یې د خیبر پښتونخوا نورو ضلعو او د افغانستان خوست ته کډه شوي وو.