د افغانستان پخوانی ولسمشر محمد اشرف غني وايي، طالبانو د افغانستان ښوونیز نظام د پاکستانيو مدرسو د سخت تعليمي نظام تابع او د هغې پر یوه څانګه بدل کړی دی.
نوموړي دا ادعا په هغه غږيز پيغام کې کړې چې د نوي لمريز کال د پيل په مناسبت يې د مارچ پر ۲۰مه پر خپله فېسبوکپاڼه خپور کړی دی. اشرف غني د طالبانو له لوري پر افغان نجونو او ښځو د زده کړو او کار بندیز خلکو ته د الله له لوري د ورکړل شوي حق تر پښو لاندې کول بللي دي.
هغه زیاتوي: "په تېرو ۱۹ مياشتو کې د هېواد تعلیمي نظام د پاکستاني مدرسو د خشک نظام تابع او د هغوی په یوه څانګه بدل شوی دی. حاکمې ډلې په خپلو دغه ډول سیاستونو یو وار بیا د نویېمې میلادي لسیزې په څېر افغانستان په یوه هېر شوي، وروسته پاتې، ګوښه شوي او نهیلي هېواد بدل کړی دی."
اشرف غني په خپل غږيز پيغام کې د طالبانو حکومت يو استبدادي نظام بللی چې په خبره يې، تر ډېره به دوام و نه کړي. هغه په عين وخت کې پر افغانانو غږ کړی چې د افغانستان د مسلو د حل لپاره ملي مکالمه وکړي.
دا هم وګورئ: د ښځو نړیواله ورځ: د طالبانو واکمنۍ د افغان مېرمنو پر ژوند څه اغېز کړی دی؟افغان طالبانو تر اوسه د اشرف غني دې تازه څرګندونو ته ځواب نه دی ويلی. د يادونې ده چې اشرف غني د ۲۰۲۱ کال د اګست پر ۱۵مه د خپلو نيږدي چارواکو سره هغه مهال متحده عرب اماراتو ته ولاړ چې طالبانو په زور کابل ونيو. نوموړي له دغه ځايه، وخت په وخت د افغانستان د بېلابېلو مسايلو په اړه بیانونه خپاره کړي دي.
طالبانو د خپل حکومت په وخت پر ښځو د کار او پر نجونو د تعليم بندیز لګولی دی چې بشري حقونو نړيوالو ادارو او افغان سیاستوالو پرې نيوکې کړې دي.
د افغانستان پخواني ولسمشر حامد کرزي د طالبانو له حکومته د نجونو پر مخ د ښوونځیو او پوهنتونونو د دروازو خلاصولو غوښتنه کړې ده. نوموړي د نوي لمريز کال په مناسبت پر خپله ټوېټر پاڼه خپور کړي يوه بيان کې زياته کړې چې طالبان دې ښځو ته د کار اجازه هم ورکړي.
…آرامش خاطر زندگی کنیم. با توجه به اهمیت بنیادی تعلیم برای رفاه، ترقی و خودکفایی کشور آرزومندم که حکومت سرپرست اسلامی با آغاز سال نو هجری خورشیدی، درهای مکاتب و پوهنتونها را به روی دختران باز نموده و زمینهٔ برگشت زنان به کار را دوباره فراهم سازد تا فرزندان کشور اعم از دختران…
— Hamid Karzai (@KarzaiH) March 20, 2023
د افغانستان په تېر جمهوري نظام کې د ملي پخلاینې د عالي شورا مشر، عبدالله عبدالله هم په یوه پیغام کې د افغان نجونو پر زده کړو د بنديز اقدام غندلی او هیله یې ښوولې چې په نوي کال کې به هغوی ته د زده کړو اوښځو ته د کار حق ورکړل شي.
طالبان دريځ لري چې هر څه د شريعت په چوکاټ کې پر مخ وړي خو دا چوکاټ یې نه دی تشريح کړی. دوی د نړيوالو فشارونو سربیره هم پر ښځو لګولي بنديزونه نه دي نرم کړي. د طالبانو مشر، ملا هیت الله څه موده مخکې ويلي وو چې نه د نړيوالو فشارونه مني او نه هم ورسره يو قدم مخکې ځي.