د میرلي پوځي مرکز مخې ته د لادرکه کړل شويو کسانو کورنیو احتجاج کړی دی

د شمالي وزيرستان په ميرلي کې په زوره د لادرکه کړل شویو کسانو کورنيو د پوځي مرکز مخې ته د احتجاج پر وخت غوښتنه کړې چې د هغوی خپلوان دې خوشې کړل شي.

پر ټولنيزو رسنيو په خپرو شويو ويډيوګانو کې ښکاري چې د اکتوبر پر دويمه شوي دې احتجاج کې نارينه، ښځې او ماشومان د پوځي چاوڼۍ د مرکزي دروازې مخې ته ولاړ دي او وايي چې پوځ یې خپلوان نيولي دي. دا کسان دعوه کوي چې نيول شوي کسان بې ګناه دي، خو په وينا يې که بیا هم ورباندې کوم تور وي نو عدالتونو ته دې حاضر کړل شي.

په ميرلي کې د ملي جمهوري غورځنګ يو مشر جمال داوړ د اکتوبر پر درېيمه مشال راډيو ته وويل چې دا اول ځل نه دی چې امنيتي ځواکونه خلک نیسي. هغه زیاته کړه چې په دې لړ کې بايد عدالتي کاروايي وشي: "موږ له کلونو راهیسې د ورکو کسانو د موندلو غوښتنه کوو، جلسې، جلوسونه کوو، مطالبه کوو چې له ورک کړل شویو کسانو سره دې د قانون مطابق چلند وشي، که جرم ورباندې ثابت شي، سزا دې ورکړي، که بې ګناه وي نو ازادي دې ورکړل شي."

دا هم وګورئ:

خبریال عمران ریاض تر ۴ مياشتو لادرکۍ وروسته کور ته رسېدلی دیګلناز وايي، ورور یې له ۱۵ کالو راهیسې ورک دیکراچۍ کې د ورکو بلوڅانو موندلو لپاره مظاهره شوې دهد لادرکه کسانو د موندلو کمېشن وايي، سږ کال ۵۳۳ نور ورک شوي

نوموړي ګیله وکړه چې د هغوی پر جلسو، غوښتنو او احتجاجونو حکومت هېڅ غور نه کوي نو ځکه هغوی په وار وار مجبورېږي چې احتجاج وکړي او خپل ماشومان او خپلې مېرمنې هم په دې فریاد کې له ځانه سره ملګري کړي.

مشال راډیو د دې احتجاج په غبرګون کې د شمالي وزيرستان د انتظامیې او پوځ دوو مسوولو کسانو د اکتوبر پر دويمه د نومونو پټ ساتلو په شرط وویل، نیول شویو کسانو د پلټنو پر مهال ورته منلې ده چې له وسلوالو سره یې اړیکې درلودې.

دغو چارواکو، چې له رسنیو سره یې د خبرو اجازه نه درلوده، دا ادعا هم وکړه چې نیولو شویو کسانو له وسلوالو سره د مرستو کولو اعتراف هم کړی دی.

د هغوی په وينا، یو شمېر هغه کسان چې له ترهګرو سره د مرستې په شک کې نیول شوي ول او د پلټنو پر مهال معلومه شوې چې بې ګناه دي، بیرته خوشې کړل شوي دي. دغو چارواکو دا ونه ویل چې دا پلټنې څنګه او چېرته کېږي او دا کسان عدالت ته ولې نه وړاندې کېږي؟

پاکستان کې د لادرکه کسانو کورنیو د خپلوانو د خوشې کولو غوښتنه کړې ده