چارواکي وايي، په شمالي وزیرستان کې په ځمکلاندې بمي چاودنه کې دوه پوځیان او په خیبر کې پر یوې پوستې په وسلوال برید کې یو پولیس وژل شوی دی.
د پاکستان د پوځ د عامه اړیکو ادارې (اې اېس پي ار) د نومبر پر ۲۲مه په یو بیان کې ویلي چې د شمالي وزیرستان په رزمک کې د امنیتي ځواکونو ګاډی د سړک غاړې رېموټ کنټرول بمي برید ښکار شو چې پکې دوه سرتېري ووژل شول.
پر پوځي کاروان د حملې ذمه واري لا چا نه ده منلې.
د نومبر پر ۲۰مه هم د رزمک په ګړیوم سیمه کې تر سړک غاړې بمي چاودنې یو امنیتي سرتېری وژلی وو.
په وروستیو کې په شمالي او جنوبي وزیرستانونو، لکي مروت، ډېره اسماعیل خان او خوا و شا سیمو کې د وسلوالو فعالیتونه زیات شوي دي چې پر ضد یې د پاکستان پوځ وخت په وخت عملیات کوي.
خیبر برید
په همدې حال کې د خیبر ضلعې د پولیسو ویاند ظهیر اپرېدي د نومبر پر ۲۳مه مشال راډيو ته وويل چې وسلوالو د نومبر پر ۲۲مه د جمرود په لالا کنډو پوستې برید وکړ.
د هغه په خبره، په حمله کې يو پولیس زخمي شو چې وروسته یې د پېښور په حیات اباد میډیکل کمپلیکس روغتون کې سا ورکړه.
پولیس چارواکي وایي، پېښه د علي مسجد تاڼې په حدودو کې شوې ده. د چارواکو په وینا، وسلوال تر پېښې وروسته تښتېدلي او دوی په سیمه کې د لټون عملیات پیل کړې دي.
په خیبر کې د پولیسو پر پوستې د برید ذمه واري لا چا نه ده منلې.
خو هغه پېښه پر داسې مهال شوې چې پوځ د خیبر په ليرې پرتو سیمو کې د وسلوالو پرضد د عملیاتو پرېکړه کړې او د تیرا له مختلفو سیمو څخه ځینې کورنۍ خوندي سیمو ته کډه شوې دي.