د خیبر ضلعې په تیرا کې پر امنیتي ځواکونو په برید کې دوه سرتېري ژوبل شوي دي.
د ملېشې ځواک د تیرا رایفلز یوه چارواکي د نوم نه ښوولو په شرط مشال راډیو ته وویل چې وسلوالو د نومبر پر ۲۹مه د تیرا په ملک دینخېلو کې د امنیتي ځواکونو پر ګاډي حمله وکړه.
دی وايي، ژوبل سرتېري روغتون ته لېږدول شوي چې روغتیايي حالت یې ښه دی.
د حملې ذمه واري لا چا نه ده منلې خو چارواکی زیاتوي چې په سیمه کې د لټون عملیات پیل شوي دي.
دا برید پر داسې مهال شوی دی چې تیرا رایفلز روانه میاشت وویل چې د تیرا په بېلابېلو سیمو کې یې د وسلوالو پرضد د عملیاتو تیاری بشپړ کړی دی.
د عملیاتو له اعلان راهیسې له سیمې څخهڅه باندې ۳۰۰ کورنیو کډې کړې دي.
دا په داسې حال کې ده چې په سیمه کې په وروستیو کې ناامني زیاته شوې ده. د نومبر پر شپږمه په تيرا کې له وسلوالو سره په نښته کې د یو افسر په ګډون څلور پاکستاني سرتېري ووژل شول.
د پاکستان د پوځ عامه اړيکو دفتر (ای اېس پي ار) هغه مهال ویلي ول چې په وژل شویو کې یو کرنل او درې سرتېري شامل ول.