په کوټه کې د کويلې یا سکرو په يو کان کې د زهرجن ګيس خپرېدو له امله ۱۱ کسان وژل شوي دي.
په بلوچستان کې د کانونو مشر څارونکي عبدالغني شاهواني رسنيو ته ويلي چې پېښه د جون پر دریمه د کوټې په ليرې پرته سيمه سنجيدي کې رامينځ ته شوې ده. د ده په وینا، د کان پر ټېکدار او منېجر سربېره نهه کان کيندونکي پکې وژل شوي دي.
د شانګلې د سکرو د کارګرانو د حقونو اتحاديې وياند عابد يار وايي، وژل شوي کسان له شانګلې سره تعلق لري.
په بلوچستان کې د کویلې کانونو د مزدورانو اتحادیې مرکزي سیکرټري سلطان لالا د جون پر څلورمه مشال راډیو ته وویل چي دا پېښه په هغه کان کې رامنځ ته شوې ده چې یوه برخه یې د زهرجن ګېس له کبله څو کاله وړاندې لا تړل شوې وه.
د بلوچستان اعلا وزیر سرفراز بګټي د جون پر څلورمه په یو بیان کې د پېښې د پلټنو او د زمه وارو کسانو د په ډاګه کولو امر کړی دی. بلخوا د پاکستان د کورنیو چارو وزیر محسن نقوي پر پېښه خواشیني او د وژل شویو کسانو له کورنیو سره خواخوږي څرګنده کړې ده.
وفاقی وزیرداخلہ محسن نقوی کا کوئٹہ کے علاقے میں کول مائن میں دم گھٹنے سے 11 کان کنوں کے جاں بحق ہونے کے واقعہ پر گہرے دکھ اور افسوس کا اظہاروفاقی وزیرداخلہ کا جاں بحق افراد کے لواحقین سےدلی ہمدردی و اظہار تعزیت افسوسناک واقعہ میں قیمتی انسانی جانوں کے ضیاع پر دلی رنج ہوا ہے۔
— Ministry of Interior GoP (@MOIofficialGoP) June 3, 2024
په بلوچستان کې زياتره وخت د سکرو په کانونو کې دا ډول پېښې رامينځ ته کېږي چې مهم لامل يې د ژغورنې او ساتنې لپاره لازمي شرايط نه پر ځای کول دي.
تر دې وړاندې، په اپرېل مياشت کې هم د بلوچستان په دوکۍ او هرنايي ضلعو کې په کانونو کې د زهرجن ګيس خپرېدو له امله پينځه کان کيندونکي وژل شوي ول. د دوکۍ د سکرو کان په پېښه کې درې او د هرنايي د سکرو کان په هغه کې دوه کان کيندونکي وژل شوي دي.
په دوکۍ کې د سکرو د کان حکومتي څارونکي محمد صدیق مشال راډيو ته ویلي وو چې د اپرېل پر ۲۴مه په کان کې د زهرجن ګيس خپرېدو له امله درې کسان وژل شوي چې پکې د افغانستان اوسېدونکي زوی او پلار هم دي. د چارواکو په خبره، بله پېښه د هرنايي د شاهرګې سيمې د سکرو په کان کې شوې ده چې پکې دوه کان کيندونکې د زهرجن ګيس له کبله وژل شوي دي.
د پاکستان د سکرو د کانونو اتحاديه وايي چې د روان ۲۰۲۴ز کال تر اپرېل میاشتې پورې په بلوچستان کې د سکرو په کانونو کې ۶۴ کان کيندونکي وژل شوي دي.
په پاکستان کې د کويلې د مزدورانو د اتحاديې د شمېرو له مخې، په ۲۰۲۳ز کال کې په هغه هېواد کې د سکرو په کانونو کې ۲۸۸ مزدوران وژل شوي ول چې زياتره يې د بلوچستان ول. د اتحاديې په خبره، تېر کال د کانونو په پېښو کې شاوخوا ۳،۰۰۰ مزدوران ژوبل شوي هم ول.
د سکرو په کانونو کې ډېری مزدوران د خیبر پښتونخوا پر شانګلې، سوات، دیر او پاړه چینار سربېره د افغانستان اوسېدونکي دي. د پاکستان د بشري حقوقو کمېشن د ۲۰۲۱ز کال په کلني راپور کې ویلي ول چې په پاکستان کې د کویلې کان کیندونکي په ډېر خطرناک چاپېریال کې کار کوي او د کارګرانو د خوندیتوب قوانین نه عملي کېږي.