د روسیې حکومت تاييد کړه چې په شمالي وزیرستان کې د يو هيلي کاپټر د پرېوتو په پېښه کې ۲ روسي وګړي وژل شوي دي.
په اسلام اباد کې د روسیې سفارت د اکتوبر پر لومړۍ نېټه په يوه خبرپاڼه کې زیاته کړه چې درېيم وژل شوی تن پيلوټ وو چې د بیلاروس دی. په بیان کې زیاته شوې چې وژل شوي روسي وګړي، نېکولای ریباکوويچ او سامويل ماردويان نومېدل. د وژل شوي بېلاروسي پيلوټ نوم سرګې کوشېليف یاد شوی دی.
‼️ The Embassy of Russia in Pakistan regrets to inform that two Russian citizens, Nikolai Rybakovich and Samvel Mardoian, and a Belorusian pilot Sergei Koshelev, who were on board the helicopter that crashed on September 28 in North Waziristan, KPK province, have been identified… pic.twitter.com/4IKRXGlIJ9
— RusEmbassy_Pakistan (@RusEmbPakistan) October 1, 2024
روسیې د هيلي کاپټر د غورځېدو سبب نه دی ویلی خو د پاکستان پوځ د سیپتمبر پر ۲۸مه په يوه خبرپاڼه کې ويلي وو چې د شمالي وزیرستان په شېوه تحصیل کې د ماړي پټرولیم کمپنۍ چارټرډ هیلي کاپټر د تخنيکي مسلې له وجې غورځېدلی. پوځ زیاته کړې وه چې په دې پېښه کې شپږ کسان وژل شوي او اته نور ژوبل شوي دي.
د پوځ مطبوعاتي څانګې (ای اېس پي ار) مشال راډیو ته په رالېږلي بیان کې زیاته کړې وه چې په اېم ای اته ډوله هیلي کاپټر کې د ۳ روسي پیلوټانو په ګډون ۱۴ کسان سپاره وو. هغه مهال د وژل شويو کسانو پوره پېژندګلوينه شوه شوې او پوځ ويلي وو چې تر ډي اېن ای ټېسټونو وروسته به معلومه شي چې وژل شوي څوک دي.
د پوځ په خبره، هیلي کاپټر په شېوه اېل فیلډ یا د تېلو ساحه کې د انجن د خرابېدو له وجې راپرېوتی دی. په بیان کې راغلي چې هیلي کاپټر د تخنیکي خرابۍ له وجې بېړنۍ ناسته کوله چې له ځمکې سره ټکر شو. ژوبل کسان د ټل پوځي روغتون ته وړل شوي دي. بیان زیاتوي چې داسې شواهد نه دي ترلاسه شوي چې ګواکې د پېښې تر شا د ورانکارو لاس وي.
ماړي پټرولیم کمپني د ګېس اېستلو کمپني ده چې د پاکستاني پوځ فوجي فاونډېشن پکې تر ټولو ډېره برخه لري. دا کمپني د شمالي وزیرستان په شېوه کې د تېلو او ګاز رااېستلو کار کوي او یو لوی پایپ لاین یې تر پنجاب پورې غځولی دی.