د پاکستان او په افغانستان کې د واکمنو طالبانو چارواکو پرېکړه کړې چې د دواړو خواو ترمینځ سامان وړونکو ډرایورانو ته به اسانتیاوې ورکوي.
په تورخم کې د پاکستان د ګمرک(کسټم) یو چارواکی ایمل شینواری، چې د خیبر د تاجرانو ډلې سره ننګرهار ته تللی وو، د جنورۍ پر ۲۶مه ناوخته یې مشال راډیو ته وویل چې هلته په شوی غونډه کې پرېکړه وشوه چې د دواړو خواوو ډرایورانو ته به سهولتونو ورکړل شي.
هغه وویل "په افغانستان کې د (طالبانو حکومت) تجارت وزیر، د ننګرهار ریاست ټرانسپورټ وزیر او د ګورنر له سیکرټري سره مو ملاقاتونه وشول او په راتلونکي کې به مو هم دا کوشش وي چې دا پوله بنده نه شي او تګ راتګ او تجارت ( ایکسپورټ امپورټ) نور هم زیات شي."
دا غونډه تر هغې وروسته وشوه چې د جنورۍ پر ۱۳مه پاکستان په تورخم دروازه هغه افغان ډرایوران اوښتو ته پرې نه ښودل چې ویزې او پاسپورټونه یې نه لرل. د دې په غبرګون کې افغانستان کې د طالبانو حکومت چارواکو هم ورته اقدام وکړ او پوله د دواړه اړخیزه تجارت پر وړاندې تقریباً ۱۰ ورځې وتړل شوه.
هغه پوله د جنورۍ پر ۲۳مه د تجارت لپاره پرانیستل شوه خو پاکستان افغان ډرایورانو ته د ضروري اسنادو د جوړولو لپاره د مارچ تر ۳۱مې مهلت ورکړ. بلخوا افغان ډرایورانو مشال راډيو ته ویلي چې باید د ویزې پروسه دې ورته اسانه کړل شي.
دا هم وګورئ:
پر تورخم د نویو محدودیتونو له وجې تجارت درېدلی دیپاکستان له افغانستان سره د سوداګرۍ لارې بیا پرانیستلېپه تورخم کې د ولاړو ټرکونو ډرایوران: د کروړونو روپيوو مالونه مو خرابېږيدا په داسې حال کې ده چې اسلام اباد وايي چې له افغانستان سره د تګ راتګ پر ټولو لارو یو ډول تګلاره عملي کوي او بې له پاسپورټ او ویزې هېچا ته د سفر اجازه نه ورکوي. د پاکستان حکومت وايي چې دا کار د هېواد د ملي امنیت په ګټه دی.
همدا لامل دی چې د بلوچستان په پښتون مېشته سیمه چمن کې د ۲۰۲۳ز کال د اکتوبر له ۲۱م راهیسې سوداګرو او مزدورانو پرلت ته دوام ورکړی دی او وايي چې حکومت باید ورته د پخوا په څېر د کندهار له سپین بولدک سره په شناختي کارډ، تذکرو یا بلې سفري اجازتنامې (پرمټ) د تګ راتګ اجازه ورکړي.
د پاکستان وفاقي حکومت په ۲۰۱۶ز کال کې پولو د انتظام (بارډرمېنېجمنټ) تګلاره عملي کړه او له هغه وخت راهیسې عامو وګړ ته پر تورخم بې له پاسپورټ او ویزې د تګ راتګ اجازه نه ورکوي خو له ټرانزېټ تجارت سره اړوند افغان او پاکستاني سوداګرو او ډرېورانو بې له ویزې د يو بل هېواد ته د تللو اجازه لرله او خپل شناختي کارډونه او تذکرې یې کارولې.
د تورخم انتظامي چارواکي وایي چې افغان ډرېورانو ته یې څو څو وارې ویلي دي چې د تګ راتګ لپاره خپل اسناد پوره کړي.
تورخم د خپل ستراتیژیک موقعیت له امله د افغانستان او پاکستان ترمینځ د تګ راتګ او تجارت تر ټولو لویه لاره ده چې ورڅخه هره ورځ زرګونه کسان او ګڼ مال وړونکي ګاډي تېرېږي.
هغه لاره د مرکزي اسیا او جنوبي اسیا هېوادونه هم له یو بل سره نښلوي.
په افغانستان کې د طالبانو تر واکمنۍ او تر هغې مخکې هغه دروازه وخت پر وخت د مال وړونکو ګاډو او خلکو د تګ راتګ پر مخ تړل شوې ده.
تر دې وړاندې د تېر کال په ډېسمېبر کې پاکستانیو چارواکو په تورخم کې يوه لوحه (ساين بورډ) لګول غوښتل، چې افغان طالبانو يې پرضد د اقدام په توګه د تورخم دروازه وتړله.
دا راز د سېپټېمبر پر شپږمه هم د تورخم دروازه تر څه باندې یوه اوونۍ وروسته له هغې تړل شوې وه چې افغان طالبانو د پاکستان امنیتي ځواکونه هلته له یوې پوستې جوړولو څخه منع کړل. هغه مهال دواړو غاړو پر یو بل ډزې کړې وې چې مرګ ژوبله یې اړولې وه.