د پاکستان وزیراعظم ويلي چې حکومت يې د "وروستی ځل" لپاره د پیسو له نړیوال صندوق (ای اېم اېف) څخه پور اخلي.
شهباز شریف د جون پر۱۵مه د پاکستان ولس ته په وينا کې وويل چې اوسمهال له دېوالیه کېدو څخه د هېواد ژغورلو لپاره له شپږو څخه تر اته اربه (مېلیارده) امریکايي ډالرو پور ته اړتیا لري او د دې لپاره له ای اېم اېف سره په مذاکراتو بوخت دی.
هغه وویل دا به د "پاکستان په تاریخ" کې د پور "وروستی پروګرام" وي.
نوموړي په خپله وينا کې اعلان وکړ چې ځینې هغه وزارتونه او ادارې به ختموي چې د ده په وینا، ملي خزانې ته د ګټې پر ځای په اربونو روپیو تاوان رسوي.
هغه په دې اړه يوازې د پاکستان د عامه کارونو ادارې (پبلک ورکس ډېپارټمېنټ یا پي ډبلیو ډي) په نوم د ادارې مثال ورکړ چې په وینا یې، د تنخاګانو، مراعاتو او نورو لګښتونو په بڼه هر کال شاوخوا دوه اربه روپۍ وړي.
شریف وویل، "هغه اداره چې د پرمختیايي کارونو لپاره له مختلفو وزارتونو او ادارو کومې پیسې ترلاسه کوي هغه څو سوه اربه روپۍ جوړېږي."
پي ډبلیو ډي په پاکستان کې د وفاقي ځمکو ترلاسه کولو او د هغوی پرمختیا، د ټولو وفاقي حکومتي ودانیو تعمیر، مرمت او ساتلو او په تعمیراتي چارو کې حکومت ته د مشورې ورکولو دندې لري.
دا هم وګورئ:
د پاکستان د مالیې وزیر د ټیکسونو بنسټ پراخولو دفاع کړې دهد پاکستان حکومت قامي اسمبلۍ ته د ۱۸،۸۷۷ اربه روپیو وفاقي بجټ وړاندې کړګیورګیېوا: پاکستان له ای اېم اېف سره د ۳ اربه ډالرو د پور په اړه تعقیبي خبرې مخ ته وړيمتحده عربي امارات په پاکستان کې د ۱۰ اربه ډالرو پانګونه کويشهباز شريف دا اعلان هم وکړ چې د بیجنګ په مرسته ۳۰۰،۰۰۰ کسان د معلوماتي ټېکنالوژۍ (انفرمېشن ټېکنالوجۍ) د روزنې ترلاسه کولو لپاره چين ته لېږدوي.
نوموړي دا څرګندونې تر هغې وروسته کړې دي چې د وفاقي اېتلافي حکومت د مالیې وزیر محمد اورنګزېب د جون پر ۱۲مه قامي اسمبلۍ ته د ۲۰۲۴-۲۵ز مالي کال لپاره د ۱۸،۸۷۷ اربه یا مېلیارده (۱۸.۸۷۷ ټرېلیینه) روپیو بودیجه وړاندې کړه.
ده وویل، حکومت د جولای له لومړۍ څخه د پیلېدونکې مالي کال پر مهال د ۱۷،۸۱۵ اربه روپیو د ګټې ترلاسه کولو هدف ږدي. په دې توګه د ۲۰۲۴-۲۵ز کال وړاندې شوی بجټ وار له مخه د ۱،۰۶۲ اربه تاوان یا خساره لري.
خو د خزانې وزیر وویل وفاقي حکومت غواړي چې د مالي اصلاحاتو او په باکفایته او اغېزناکه ډول د لګښتونو له لارې د اقتصادي ثبات او وده باوري کړي.
هغه زیاته کړه چې حکومت د بودیجې په مسوده کې وړاندیز کړی دی چې د مالیې بنسټ باید پراخ شي او داراز، زیاتې پیسې ګټونکي باید لوړه مالیه ورکړي.
د پاکستان حکومتونو په تېرو کلونو کې د ای اېم اېف د پور د پروګرامونو شرطونو پوره کولو لپاره یو لړ اقدامات کړي دي چې پکې کفایت شعاري، د سرکاري لګښوتو کمول، پر انرژۍ او نورو شیانو رعایت ختمول، نوي ټیکسونه لګول او د مالیو غونډولو نظام پراخول شامل دي.
پاکستان له ۲۰۱۹ کال راهیسې له لوی اقتصادي بحران سره مخامخ دی او پر هم هغه کال یې د پیسو له نړیوال صندوق (ای اېم اېف) سره د شپږ اربه ډالرو د پور درې کلن تړون لاسلیک کړی وو.
تر دې وروسته حکومت له ای اېم اېف سره د درې اربه ډالرو د پور بله موافقه وکړه چې له مخې یې له هغې ادارې اجراییوي ډلې د ۲۰۲۳ کال د جولای پر ۱۲مه پاکستان ته د درې اربه ډالرو نهه میاشتنی پروګرام تایید کړ او ورسره سم یې ورته د پور لومړی قسط، چې ۱.۲ اربه ډالر جوړېده، ورکړ.
ای اېم اېف د ۲۰۲۴ز کال په جنورۍ کې پاکستان ته د څه باندې ۷۰۵ مېليونه ډالرو پور دويم او د اپرېل په پای کې یې د پور وروستی قسط، چې ۱.۱ اربه ډالر جوړېدل، ورکړ.