د طالبانو حکومت د هغو لسګونو نجونو مخه نیولې چې غوښتل یې د زدهکړو لپاره دوبۍ ته لاړې شي.
د الحبتور ګروپ په نوم د یو کاروباري مرکز مشر خلف بن احمد الحبتور وايي، د طالبانو حکومت هغه ۱۰۰ نجونه چې غوښتل یې د اګست ۲۳مې پر سهار په دوبۍ پوهنتون کې د زده کړو لپاره سفر وکړي، د کابل له هوايي ډګره ستنې کړي دي.
هغه پر اېکس، چې پخوانی نوم یې ټوېټر وو، په یو لیکلي او ویډیويي بیان کې د طالبانو پر اقدام د "مایوسۍ" څرګندونه کړې او دا کار یې پر "انسانیت، تعلیم، مساواتو او عدالت ګوزار" بللی دی.
I am unable to express the disappointment I feel now as The Afghan female students, whom I had provided an educational scholarship in collaboration with the @uniofdubai presented by Dr. Eesa Al Bastaki @ebastaki, were unfortunately unable to reach #DubaiAirport this morning to… pic.twitter.com/gJK9dB2yTf
— Khalaf Ahmad Al Habtoor (@KhalafAlHabtoor) August 23, 2023
الحبتور په بیان کې کاږي، "زه هیله لرم چې د طالبانو حکومت به دې پرېکړې ته بیا کتنه وکړي. زه غوښتنه کوم چې دوی ته اجازه ورکړي. دوی د زدهکړو او سفر حق لري. دا عمل د منلو نه دی."
د طالبانو حکومت تر اوسه د الحبتور څرګندونو په اړه څه نه دي ویلي.
د الحبتور ګروپ مشر وايي، د دوبۍ د پوهنتون په همکارۍ يې هغو نجونو ته تعلیمي سکالرشېپونه (بورسونه) ورکړي ول او تر خوا یې له حکومت سره په همغږۍ ورته د اوسېدو، امنیت، ټرانسپورټ، روغتیا او په نورو برخو کې اسانتیاوې برابرې کړې وې.
هغه پر نړیوالې ټولنې او ټولو ښکېلو اړخونو غږ کړی چې د هغو زده کوونکو نجونو د ژغورنې لپاره ژرترژره اقدام وکړي.
دا هم وګورئ:
حامد کرزی وايي طالبان دې د نجونو پر زده کړو بندیز لېرې کړيد طالبانو د واکمنۍ دوه کلونه: ملګري ملتونه وايي دا فکر غلط وو چې طالبان بدل شوي ديد اسلامي همکاريو سازمان مشر: طالبان دې نجونه تعليم ته پرېږديطالبانو چې د ۲۰۲۲ز کال په ډېسېمبر کې په پوهنتون کې د نجونو پر زده کړو بندیز ولګاوه نو الحبتور ۱۰۰ افغان نجونو ته د بورسونو (سکالرشېپونو) ورکولو اعلان وکړ.
الحبتور په بیان کې د یوې هغې زده کوونکې غږ هم خپور کړی چې طالبانو یې پر هوايي ډګر د سفر مخه نیولې وه.
هغه نجلۍ چې نوم یې نه دی ښوول شوی وايي، "موږ اوس هوايي میدان کې یو خو حکومت اجازه نه راکوي چې دوبۍ ته ولاړې شو. دوی ان هغوی ته هم اجازه ور نه کړه چې محرم یې درلود. کله چې دوی د زدهکوونکو ویزه او ټېکېټ ولیدل، اجازه یې را نه کړه."
د طالبانو حکومت تر دې وړاندې هم په هوايي میدان کې د هغو نجونو او ښځو د سفر مخه نیولي چې محرم یې نه درلود.
د طالبانو حکومت د امر بالمعروف او نهي عن المنکر وزارت د ۲۰۲۱ز کال په ډېسېمبر کې په یو امر کې له محرم پرته تر ۷۸ کېلومیټره لیرې د نجونو او ښځو پر سفر بندیز لګولی وو.
د ۲۰۲۱ز کال په اګست کې پر افغانستان تر واکمنېدو وروسته، طالبانو تر شپږم ټولګي پورته د نجونو پر زده کړو بندیز ولګاوه او تر هغې وروسته د ۲۰۲۲ز کال په ډېسېمبر کې یې د پوهنتونونو دروازې هم د نجونو د زده کړو پر مخ وتړلې.
طالبانو داراز، په ډېرو حکومتي او ټولو ناحکومتي ادارو کې د ښځو کار هم بند کړی دی.
طالبان وايي چې د "اسلامي شریعت" په رڼا کې یې ښځو ته ټول حقونه ورکړي دي او د نجونو د زده کړو لپاره د یو مېکانېزم پر جوړولو کار کوي.