د لوګر ولایت چارواکي وايي چې د چارشنبې ورځې سهار مهال د یاد ولایت مرکز اړوند د الیاس خان کلا په سیمه کې د نامعلومو وسلهوالو له لوري د یوې مؤسسې شل تنه ماین پاکان تښتول شوي دي.
د لوګر د والي ویاند سلیم صالح مشال راډیو ته وویل چې د سټرلېنګ په نوم د ماین پاکوونې د مؤسسې شل تنه ماین پاکان په یو کاسټر موټر کې د خپل دفتره د کار ساحې ته په لاره وو چې د مرکز پل علم د الیاس خان کلا په سیمه کې د وسلهوالو لهخوا نامعلوم لوري ته وتښتول شول.
نوموړی زیاتوي، د ماین پاکانو د موندلو لپاره د کشفي او امنیتي ادارو لهخوا هلې ځلې پیل شوې دي.
سلیم صالح زیاتوي:
"د لوګر مرکز مربوط د الیاس خان کلا په سیمه کې وسلهوالو مخالفینو د سټرلېنګ مؤسسې یو کاسټر موټر چې شل تنه پهکې سواره وو، ټول ماین پاکان دي، دوی يې له ځانه سره بیولي دي، امنیتي او کشفي ارګانونو په دې اړه پلټنې پیل کړي، وسلهوالو مخالفینو له دې څو ځلې وړاندې هم د یادې مؤسسې موټر او ماین پاکان تښتولي چې خوشبختانه زموږ د امنیتي سرتېرو په هلو ځلو روغ رمټ ژغورل شوي او خپلو کورنیو ته سپارل شوي دي."
د لوګر ولایت چارواکي که څه هم د ماین پاکانو د برمته کولو پړه په وسلهوالو مخالفینو اچوي، خو تر اوسه کومې وسلهوالې ډلې د دې قضيې مسؤلیت پر غاړه نهدی اخیستی.
ویل کېږي، پخوا هم څو ځلې د وسلهوالو له لوري د سټرلېنګ په نوم د ماین پاکۍ کارکوونکي او موټر تښتول شوي چې بیا وروسته د امنیتي ارګانونو په هلو ځلو بېرته روغ رمټ خوشې شوي دي.
راپور: نجیبالله الوخېل
