پراګ: د پاکستان وفاقي حکومت په قبايلي سيمو کې د اصلاحاتو عملي کولو په لړ کې د ځينو پيچلو قانوني مسلو د لرې کولو لپاره قانون سازي کوي.
په اسلام اباد کې د سرحداتو وزارت يو وياند ډاکټر اشرف علي وايي چې د خيبر پښتونخوا د صوبايي حکومت هغه وړانديز منل شوی چې د اصلاحاتو عملي کولو لپاره دې په کميټۍ کې وزيراعلی ، کور کمانډر او صوبايي چيف سکتر شامل کړل شي.
ډاکټر اشرف علي وويل ، دا کميټۍ به له وفاقي حکومت سره د قبایلي سیمو د اصلاحاتو په لړ کې پر موجودو پيچلو قانوني مسلو خبري کوي.
هغه وویل چې د قامي اسمبلۍ د راتلونکې غونډې په ایجنډا کې دا شامله ده چې د قبایلي سیمو د اصلاحاتو په اړه خبرې اترې وشي.
ډاکټر اشرف علي زیاته کړه چې د قبايلي سيمو د لس کلن ټولنیز ، اقتصادي پلان لپاره نومونه غوره کړل شوي چې د دې پروژو چارې به پرمخ وړي.
په پارليمان کې د واکمن مسلم ليګ (ن) ګوند غړی شهاب الدين خان وايي چې حکومت د اصلاحاتو په عملي کولو کې تادي ونکړه او له سياسي مصلحته کار اخلي.
خو له خيبره د قامي اسمبلۍ غړي شاه جي ګل اپرېدی وايي چې د اپريل پر ۱۰مه نيټه د اسمبلۍ غونډې لپاره ستراتیژي جوړه کړل شوې ده.
شاه جي ګل اپرېدي وویل ، دوی به هڅه کوي چې په اسمبلۍ کې پرې بحث ونه نشي بلکې منظوري يې ورکړل شي.
نوموړي وویل چې د اصلاحاتو عملي کولو لپاره د قانون وفاقي وزارت او د کميټۍ مشر خپل کارونه سرته رسولي دي او له دوی سره په تماس کې دي.
د راتلونکې ګل په ورځ په قامي اسمبلۍ کې د فاټا اصلاحاتو په اړه بحث په داسې حال کې کيږي چې ځيني سياسي ګوندونو د هغو سيمو حکومتي اصلاحات رد کړي او غوښتنه کوي چې په قبایلي سیمو کې د د هر ډول بدلون لپاره د هغه ځای له ولس رایه واخیستل شي.
