د دغه سکول یو استاد اصغر خان وایي سږ کال د سکول د خرابو نیتجو یوه وجه دا ده چې استادان کم او زده کوونکي ډير دي. هغه زیاته کړه ((په نهم کې موږ سره سږ کال ۸۶ زده کونکي وو. دا بیا د یو استاد لپاره کنټرول کول ډیر ګران وي. دا شان موږ سره په سکول کې د استادانو درې پوسټه خالي وو او د یو استاد په یوه اونۍ کې ۳۲ساعته يا پيريده وو.))
د شیخ جانې سرکاري سکول پرنسپل محمد ګلزار بیا وایي زیاتره زده کونکي د دوی په سکول کې په انګریزی کې ناکام شوي دي. ((زموږ سکول کې ۱۸ د استادانو پوسټونه دي. درې لا هم خالي دي. موږ سره د ساینس مضمون ځانګړی يا سپيشلسټ استادانو کمی دی. په لسم کې لس زده کونکي په يوې يا دوو نمبرو ناکام شوي دي. هغه به دوی له بورډ ورکړي او باقي موږ خپلې غلطیانې منو.))
د سرکاري سکولونو د خرابو نتيجو يوه لويه وجه د استادانو کمی دی. يو يو ښوونکی ګڼ مضمونونه ښئ چې سم کار نه دی
د صوابۍ يو بل ښوونځي، شیخ جانې استاد اصغر خان وایي د سرکاري سکولونو يا ښوونځيوو د زده کونکو مور او پلار هم له خپلو بچو څخه د دوی د تعلیم په اړه پوښتنه نه کوي. هغه زياتوي: (( د شخصي سکولونو د زده کونکو مور او پلار پیسې زیاتې ورکوي نو د خپلو بچو د تعلیمې پرمختګ په اړه هم ځان خبر ساتي.))
د مردان بورډ د نتیجو ترمخه د نوښار دازاخیل پایا د جینکو هایي سکول هم په هغو ښوونځيوو کې دی چې پکې په نهم او لسم ټولګيوو کې زیاتره جینکۍ ناکامې شوي دي. د دغه سکولپرنسپله فرحت بیګم وایي نن سبا زیاتره زده کونکي د نقل په تمه ناست وي نو ځکه فیل شي. هغه زياته کړه: ((سږ کال زموږ په سکول کې د ریاضۍ استاده هم وه، هغې به اضافي کلاسونه هم اخیستل خو دلته د ماشومانو او مور پلار زمه واري هم جوړیږي. بیا د ساینس او آرټس ریاضي هم اوس بېله شوه، کتابونه ډیر لوی او اوږده دي، خو استاد یي لا هم یوه ده.))
د خیبر پښتونخوا د تعلیم په اړه د سټینډنګ کمیټۍ چیرمین محمد عارف وایي دوی دا مني چې سږ کال نتیجې ډیرې ښې نه دې راغلي خو دوی به په روانه اونۍ کې په دې اړه یوه غونډه هم کوي او ټولو هغو ستونزو ته به حل راوباسي چې له وجې يې دا ناکامه زده کوونکو شمېره زياته ده.
بلخوا د تعليمي چارو پوه، پروفیسر فضل نصیر وایي د سرکاري ښوونځيوو د ښو نتيجو لپاره باید د شخصي او سرکاري سکولونو نظام یو شي. د هغه په وينا ښه استاد باید وستایل شي او د سکولونو بنیادي مسلو ته زیات پام وشي.
