پراګ - د اګست پر ۲۷مه، په پاکستان کې تحریک انصاف او مخالفو ګوندونو د ولسمشرۍ څوکۍ ته د خپلو نوماندانو کاغذونه جمع کړي دي.
د پاکستان اپوزیشن ګوندونه د اګست پر ۲۵مه په مري کې تر ګڼګوندي غونډې وروسته هم د یو نوماند په نوم سلا نشول.
دوی هغه مهال اعلان کړی وو چې د اګست پر ۲۶مه به د شریک نوماند نوم اعلان کړي خو داسې یې ځکه ونکړل چې مسلم لیګ (ن) د پیپلز ګوند د اعتزاز احسن پر نامه توافق نه کاوه.
مسلم لیګ (ن) پیپلز ګوند ته ویلي ول چې بل امېدوار دې د ولسمشرۍ څوکۍ انتخاباتو ته ودروي خو د پیپلز ګوند مشرتابه و نه منله.
تر دې وروسته مسلم لیګ (ن) او نورو اپوزیشن ګوندونو د متحده مجلس عمل په نوم د ګوندونو اتحاد او د جمیعت علمای اسلام (ف) مشر مولانا فضل الرحمان څوکۍ ته کاندید کړ او هغه د اګست پر ۲۷مه د نوماندۍ کاغذونه داخل کړل.
اړوند مطلب:
د پاکستان ولسمشر څنګه ټاکل کېږي؟
د پیپلز ګوند اعتزاز احسن او د واکمن تحریک انصاف ډاکتر عارف علوي هم خپل کاغذونه داخل کړل چې انتخاباتي افسر به یې د اګست تر ۲۹مې جاج اخلي.
د نوماندانو نوملړ د اګست تر ۳۰مې وروسته خپرېږي او تر هغه وخت هر امېدوار کولای شي چې خپل کاغذونه بېرته واخلي یعنې له نوماندۍ په شا شي.
تر دې وروسته د پاکستان قامي او صوبايي اسمبلۍ او د سېنېټ غړي ولسمشر ټاکي.
ټاکل شوې چې د ولسمشر انتخاب د سېپټېمبر پر څلورمه وشي.
