د سوات پولیس وايي چې یوه شپږ کلنه ماشومه یې په سوره کې د ورکول کېدو ژغورلې ده.
د سیمې د پولیسو مشر ډي پي او دلاورخان بنګش د جنورۍ پر ۲۹مه مشال راډیو ته وویل چې د خوازه خېله په لېرې پرته سيمه لاښار کې جرګې په یوه کورنۍ شخړه کې یوه شپږ کلنه ماشومه یو ۱۴ کلن هلک ته د واده کولو پرېکړه کړې وه.
پولیس وايي، پر یوه اطلاع دغه ځای ته ورغلل او د واده کوښښ یې ناکام کړ.
بنګش وویل چې د جرګې د ۱۷ کسانو خلاف مقدمه درج شوې ده چې پکې د ماشومې او هلک پلرونه هم شامل دي.
پولیس وايي، ۱۴ کسان یې نیولي دي او د پاتې دریو کسانو، چې دا وخت پټ شوي دي، لټون روان دی.
پولیس وايي، د دغو کسانو خلاف به عدالتي کاروايي کېږي چې د جرم ثابتېدو په صورت کې ملزمانو ته د ۱۰ کالو د بند سزا اورول کېدای شي.
په خيبر پښتونخوا کې له دې وړاندې هم په سوره کې د نجونو ورکولو پېښې رامنځ ته شوي دي خو حکومت وايي د مخنيوي لپاره يې کوټلي ګامونه پورته کړي دي.
